Connect to Us LinkedIn Youtube RSS

20-2016 - Business Plaza-Get Started! Un bes mas, exitoso!
  • PDF
  • Print
  • Email
Oranjestad, 6 di juli 2016 – Diasabra ultimo dia 2 di juli 2016, Camara di Comercio (KvK) a tene su di 5 edicion di Business Plaza-Get Started! E evento a resulta den un exito grandi unda cu a conta cu aproximadamente 120 participante. E sala di conferencia tabata completamente yen, como tambe e area di recepcion unda cu a brinda ‘live streaming’ pa ofrece mas cupo na participantenan.  
Presidente di Camara di Comercio, sra. Daphne Agius-Cesareo-Lejuez, na apertura di e evento a duna su palabranan di bon bini y apoyo na un y tur cu tin e pensamento pa habri un negoshi. Sra. Agius-Cesareo-Lejuez a comenta cu ta importante pa crea empresarionan profesional cu ta inspira y bon prepara pa alcansa nan metanan, unda cu KvK ta hunga un rol importante y pues ta brinda e apoyo necesario pa logra esaki.
 
Business Plaza-Get Started! ta enfoca riba empresarionan recien estableci of e persona cu tin un of mas ideanan pa un negoshi. Pa brinda informacion na e personanan aki, varios topico interesante a ser presenta parti mainta, unda cu oradornan profesional invita y tambe coleganan di KvK a comparti nan conocimento y experencia cu e publico presente. Pa prome biaha, a comparti informacion tocante e plataforma virtual ‘Caribconnect’ crea pa conecta empresarionan cu inversionista y mentor y especialmente pa forma un conexion entre OCT’s den region; esaki como un di e proyectonan organisa y funda pa COSME. 
Despues di e presentacion personanan interesa por a registra di biaha na e plataforma aki pa asina traha un account pa por intercambia informacion cu potencial inversionista. Pa mas informacion tocante e portal aki por fabor manda un e-mail pa: This e-mail address is being protected from spambots. You need JavaScript enabled to view it .
Otro informacion popular y hopi pidi ta tocante e curso cu KvK ta brinda, esta ‘Empresario Independiente Chikito/Mediano’ cu lo inicia e aña aki na oktober. Sra. Sonja Velthuizen a splica e detayes y tambe procedura pa participa na e curso aki. Pa esaki tambe registracion di participantenan a wordo procesa e dia aki mes despues di e presentacion y ya tin varios persona cu a mustra interes. 
 
Durante e break participantenan a haci uso di e oportunidad pa netwerk cu otro disfrutando di snacks y refreshments. Ademas varios persona a haci bon uso di e oportunidad pa haci preguntanan specifico durante un consulta priva cu conseheronan di KvK. 
Un servicio cu KvK a añadi e biaha tabata e posibilidad pa registra un eenmanszaak of VOF (Partnership) riba dia di e evento. Participantenan sigur a keda contento cu e posibilidad aki. 
  
Business Plaza-Get Started! a conta cu presencia y representacion di Departamento di Asunto Economico como tambe Free Zone Aruba cu a brinda informacion valioso na interesadonan. 
Pa loke ta trata e seminarionan cu a tuma lugar parti atardi, tanto esun di ‘Administracion Financiero’, como tambe esun di ‘Business Plan’ tambe a wordo bon atendi.
 
E reaccion ricibi tabata uno sumamente positivo y por conclui cu sigur participantenan a keda contento y entusiasma cu e informacion brinda na nan. KvK kier expresa palabranan di gradicimento na  sponsors Orbitalnets, Manrique Capriles y Carmen Snacks pa nan aporte cu a haci e evento aki posibel y na tur esnan cu a contribui pa realisa un otro edicion exitoso di Business Plaza-Get Started!: Sra. Diana Helder-Lerma di D-Shop, Sr. Herbert Diaz di SQS Consultancy & Research, Sr. Dave Martinus di ActionCoach, Sr. Jose Arends di Shanee Management y Sra. Lay Hing de kort-Yee di Cornerstone Economics y por ultimo na Departamento di Asunto Economico y Free Zone Aruba.
 
Proximo edicion di Business Plaza lo trata e edicion ‘Step Forward!’ dedica na empresarionan existente cu kier expande nan negoshi cu lo tuma luga na luna di januari 2017.  
Pa mas informacion tocante edicionnan di Business Plaza, curso Empresario Independiente Chikito/Mediano y otro evento di KvK, tuma contacto cu Business Information & Support na 582-1566, ext. 27/35/42/30 of manda un e-mail pa: This e-mail address is being protected from spambots. You need JavaScript enabled to view it
 
 
Aruba, 6 di juli 2016
Camara di Comercio y Industria (KvK)
alt alt alt alt alt
 

By orbitalnets.com