Connect to Us LinkedIn Youtube RSS

13-2016 - Nombramento di Secretario/Director Ehecutivo di KvK
  • PDF
  • Print
  • Email
Oranjestad – Directiva di Camara di Comercio y Industria Aruba (KvK) ta anuncia cu entrante 1 di mei 2016 Sra. Sofia J. (Sonja) Velthuizen a keda nombra como Secretario/Director Ehecutivo. Sra. Velthuizen a fungi como Secretario y Director Interino desde e despedida di Sr. Leo Maduro na 2015. Despues di a sondea e mercado local y a base di evaluacion di e funcionamento di Sra. Velthuizen, a opta pa pasa pa nombramento definitivo y permanente di Sra. Velthuizen pa e funcion importante aki.
 
Prome cu e funcion di Director Interino Sra. Velthuizen a funciona tambe na completo satisfaccion di KvK como hefe di e departamento Business Information & Support (BIS), unda cu e tabata responsabel pa atende publico, organisa curso, charla y eventonan special y periodico cu KvK ta ofrece ya pa varios aña. Den su trayectoria profesional Sra. Velthuizen a adkeri experiencia den educacion specialisa como Director di Doc Opleidingen y a introduci varios iniciativa den e direccion aki na KvK, entre otro e conocido curso cu certificado di KvK pa empresario independiente chikito mediano cu recientemente a conoce su di dos grupo. Sra. Velthuizen ta bon conoci cu hopi instancia y empresa den tanto sector publico como priva y den su funcion nobo e lo sigui haci uso di su conocimento pa por eherce e responsabilidadnan como Secretario y Director Ehecutivo di KvK.
 
Directiva di Camara di Comercio ta considera di a haci e escogencia corecto y ta desea Sra. Sonja Velthuizen hopi exito y forza den cumplimento di su debernan y tin confiansa di lo sigui mira e entusiasmo y dedicacion demostra desde cu el a drenta den servicio di KvK na 2011. Directiva ta spera tambe cu su Secretario/Director nobo lo por conta cu cooperacion di un y tur, manera tabata e caso den pasado cu su antecesornan.
 
 
Camara di Comercio y Industria Aruba (KvK)
12 di mei 2016
alt
 

By orbitalnets.com