Connect to Us LinkedIn Youtube RSS

54-2015 - KvK: Evita pago innecesario na 2016
  • PDF
  • Print
  • Email
Oranjestad – Pa medio di esaki Camara di Comercio y Industria (KvK) ta trece na conocimento di tur empresa cu tin nan contribucion anual (jaarlijkse bijdrage) pendiente ainda pa aña 2015, pa paga esaki preferiblemente prome cu dia 31 di december di e aña aki. Esaki ta conta mas ainda pa e negoshinan cu a cancela nan actividadnan durante e aña aki, of den añanan anterior, y esnan cu no ta desea di continua cu nan negoshi na 2016. 
Si cancela un eenmanszaak of VOF prome cu 1 di januari 2016, no tin obligacion pa paga contribucion anual pa e aña nobo (2016). Pero, manera 2016 cuminsa, KvK ta obliga pa ley pa cobra e contribucion anual completo pa e aña nobo na tur esnan registra. Pa evita gasto innecesario ta miho pa paga prome cu aña termina. 
 
Cancelacion di negoshi:
Ta recorda tur cliente cu pa cancela negoshi mester tuma na cuenta:
1. Eenmanszaken, Vennootschap onder Firma (VOF) : ora cu cancela e negoshi, registracion na KvK ta termina completamente y no ta keda ningun compromiso pendiente. 
2. NV, AVV, VBA, Commanditaire Vennootschap (CV) y otro entidad cu personeria huridico manera coöperatieve vereniging y stichting cu negoshi: ora ta cera negoshi di e entidad, e persona huridico ta keda registra obligatoriamente, como persona huridico activo, sin negoshi. E haltura di e contribucion anual ta depende di e capital cu ta keda inverti den e entidad sin negoshi.
3. Si e entidadnan menciona bao di 2 cu ta persona huridico ta desea di termina nan registracion completamente, nan lo mester pasa pa likida e persona huridico a traves di disolucion (ontbinding) di e persona. Pa esaki tuma luga na un manera corecto, mester tuma na cuenta e stipulacionnan segun e statutonan di e entidad.  Mas informacion y conseho tocante e proceso di disolucion y likidacion por ser obteni na KvK. 
 
Documento necesario
Pa cancela negoshi mester efectua esaki solamente atraves di un persona autoriza, por ehempel doño, director of apoderado. Pa cancelacion mester pasa personalmente na KvK of por download formulario 13 of formulario 17 (depende di e tipo di negoshi) di nos website http://www.arubachamber.com/forms. Entrega e formulario completamente yena y firma, e mester ta acompaña pa un copia di identificacion valido di e firmante, sea paspoort of cedula. Tene cuenta cu ora ta trata di un VOF, ta necesario pa tin firma di tur partner (vennoten) ariba e formulario pa por completa e cancelacion. Ora ta trata di un persona huridico, mester presenta un copia di e registro di accionista y un copia di e notulen di e reunion general di accionista of miembro, unda e decision pa disolucion a tuma luga.
 
Cancelacion di negoshi o otro cambio den dato di e compania no lo ser procesa si no cumpli cu tur obligacion, e.o. contribucion anual y autorizacion adecua pa apoderado. Tene cuenta cu e obligacion di pago stipula den art. 15 Ordenanza di Registro Comercial ta mara na e hecho di registracion na KvK y no ta depende di si e compania ta opera of no.
 
Pago
Por haci pago di e siguiente maneranan:
Pago via banco, online o via  transfer order; nos cuentanan na diferente banco ta aparece abao riba homepage di nos website: www.arubachamber.com
Pago na KvK: via swipe cu ATM card; via cheque y cash. 
Por fabor limita pago cash y cheque mas tanto posibel.
 
 
Aruba, 21 december 2015
Camara di Comercio y Industria (KvK)
 

By orbitalnets.com