Connect to Us LinkedIn Youtube RSS

27-2015 - Entrega di certificado 'Empresario Independiente Chikito y Mediano'
  • PDF
  • Print
  • Email
Oranjestad  –  Despues di 6 luna completo y intensivo di les, e curso Empresario Independiente Chikito/Mediano cu a inicia na october aña pasa, a yega na su fin. Esaki tabata e promer curso di e nivel aki cu Camara di Comercio y Industria (KvK) a organisa, como parti di su tarea pa informa y educa e (futuro) empresario pa ta mihor prepara na momento di establece y maneha su negoshi. Pa e motibo aki KvK ta colabora grandemente na esaki, tenieno e costonan pa participa hopi limita pa banda di e participante. 
 
Consistiendo di un cantidad amplio di topico manera marketing, legislacion, finanzas y administracion, impuesto, recurso humano y varios otro aspecto di negoshi, e curso sigur ta amplia conocemento di e participante. Pa e participantenan e periodo di curso no tabata algo facil pero un periodo extenso cu a rekeri hopi sacrificio y trabao duro pa por pasa nan examen cu exito. Algun persona tin un negoshi caba y otro tin nan trabao diario, pues e preparacion pa cada les mester a sucede den oranan extra. Pa 6 luna largo 2 biaha pa siman pa 2 ora y mei e participante mester tabata presente den oranan di anochi y sin laga afo e oranan dedica na ‘huiswerk’ y estudio extra pa e examen final. Un total di 15 participante a logra termina e examen cu exito y a ricibi nan certificado pa esaki. 
 
Entrega di certificado a tuma lugar diabierna 22 di mei na KvK, sigui pa un celebracion ameno cu familiar y amistades cu algo di come y bebe. Entrega a ser haci pa Presidente di KvK sra. Daphne Lejuez kende tambe a expresa palabra di elogio na cada participante pa nan esfuerzo y logro pa cu e curso. Tambe a hiba palabra director di KvK, sr. Leo Maduro y hefe di departmento ‘Business Info & Suppport’, sra. Sonja Velthuizen, gradiciendo un y tur pa nan participacion y dedicacion durante trayectoria di e curso. 
Manera ya a ser menciona na otro ocasion, e certificado cu participantenan a ricibi despues di a gradua pa nan examen ta comparabel cu e ‘middenstands-diploma’ na Hulanda. E ta uno di gran balor tanto pa e persona como pa su negoshi y cu lo ser registra tambe na Camara di Comercio na momento cu e negoshi wordo inscribi.
Palabranan di gratitud ta bai na tur esnan cu a coopera na realisa e curso aki: Dave Martinus, Patrick Melchiors, Bruce Harms, Ryan Maduro, Guido Picus, Bert Vermaas, Departamento di Asunto di Legislacion, Ramphis Tromp,  Frank Snijders, Goswin Oduber, Robert Lejuez, Ronald Erasmus y coleganan di Camara di Comercio.
 
Preparacion pa e segundo curso di Empresario Independiente Chikito/Mediano ya ta andando y hasta por conta cu algun inscripcion di persona interesa. Esaki lo inicia na october 2015 y cu un duracion di 6 luna lo termina na april 2016. KvK ta spera di por sigui brinda e apoyo y educacion necesario pa esun cu kier cuminsa cu su empresa por ta bon prepara. 
 
Tur esnan cu kier participa den e siguiente curso, of ta desea di haya mas informacion por tuma contacto cu sra. Sonja Velthuizen na This e-mail address is being protected from spambots. You need JavaScript enabled to view it of yama 582-1566 ext. 42.
 
Aruba, 25 di mei 2015
Camara di Comercio y Industria (KvK)
        
 

By orbitalnets.com