Connect to Us LinkedIn Youtube RSS

03-2015 - KvK a introduci presidente nobo durante recepcion
  • PDF
  • Print
  • Email
Oranjestad, 17 di januari 2015 – Diahuebs, 15 di januari 2015, Camara di Comercio y Industria Aruba (KvK)  a tene su recepcion di aña nobo, unda a presenta su presidente nobo, Sra. Daphne Agius Cesareo-Lejuez, vice-presidente Sr. Robert Carrasquero y presidente interino, Sr. Frans de Mey.
 
Sra. Agius-Cesareo-Lejuez ta e tercer hende muher cu ta ocupa e puesto di presidente di KvK, desde su inicio na 1930. Ora e presidente a dirigi su mes na e invitadonan, el a trece dilanti cu pe ta un honor pa e oportunidad otorga. Tambe e presidente a papia brevemente tocante e economia di Aruba y su retonan, y e dificultadnan cu aña 2014 tabatin. Apesar di esey economia a crece den cierto area, gracias na e creatividad y esfuerso di sector priva.
 
Den su speech, Sra. Agius-Cesareo-Lejuez a quote Christine Lagarde, managing director di IMF, unda el a trece dilanti tres punto cu ta importante pa nos logra e aña aki den nos economia. E prome ta pa aumenta crecemento economico y crea empleo. E di dos punto pa realiza crecemento mihor comparti. E tercer punto ta cu e crecemento aki mester ta sostenibel y balanza. E tres puntonan aki ta ser logra solamente ora ta ehecuta pa nos tur y no solamente pa un sector. 
 
No ta discarta cu lo tin algun cambio impopular na caminda, pero e cambionan aki mester ser haci  solamente cu e interes sincero di pueblo di Aruba na vista. Na KvK, nos ta convenci cu dialogo continuo ta e vehiculo pa nos logra haya mihor resultado, cu ta encurasha stabilidad y properidad pa nos economia local.
 
Director ehecutivo di KvK, Sr. Leo Maduro, a gradici e presidente saliente, Sr. Omar Tromp , y vice-presidente saliente, Sra. Lindsey Wever pa nan dedicacion na KvK durente 2014. Na mes momento el a desea Sra. Agius-Cesareo-Lejuez y henter e board di KvK hopi exito den 2015.
 
Finalmente, presidente saliente sr. Omar Tromp, cu no a pone su mes disponibel pa un periodo mas,  pa motibonan personal, a gradici su coleganan pa nan apoyo durante e aña cu a pasa y a desea  e presidente nobo exito y a ofrece su apoyo como miembro di KvK.
 
Aruba, 17 januari, 2015
Camara di Comercio y Industria (KvK)
 
  
 

By orbitalnets.com