Connect to Us LinkedIn Youtube RSS

13-2011 - Camara di Comercio ta lansa su website nobo
  • PDF
  • Print
  • Email

Oranjestad - Awe Camara di Comercio y Industria Aruba (KvK) ta lansa su website nobo oficialmente. Pa algun siman KvK tabatin dos website online. Uno ta e conocido website www.arubachamber.com y e otro ta www.kvk.aw cu tabata den un periodo di prueba. E meta di e website nobo ta pa sigui mehora e servicio di KvK na nos cliente, y ta forma parti di e rumbo nobo di KvK pa digitalisa y inova su producto y servicionan. E website nobo tin un look yamativo. E ta mas dinamico y ta ofrece varios elemento nobo, haciendo KvK su servicionan mas accessibel.

New look
Prome cos cu ta resalta ora yega ariba e website nobo ta su look fresco. E bishitante ta nota cu producto, informacion y documentonan ta disponibel den maximo di dos click. Kvk a opta pa un sistema di nabegacion simpel y cu menos interrupcion cu ta posibel. E meta principal ta pa haci e experiencia di e usuario uno placentero.

Features nobo
E website nobo ta inclui varios features nobo manera e posibilidad pa haci cita online, encuesta, posibilidad pa ordo y haci pago di producto online, contesta riba preguntanan frequente (FAQ), informacion tocante e diferente tipo di permiso y mucho mas. Ademas e website ta inclui varios elemento mehora, manera e registro online y e calendario di evento.

Formulario nobo pa registro comercial y registro di fundacion
Tur esnan cu kier registra un negoshi of fundacion cu mester ahusta e informacion registra, mester haci esaki por medio di formularionan oficial. Entrante dia 1 di juli KvK ta ofrece formularionan nobo cu ta mas facil pa usa y cu tin un layout moderno. Tur formulario ta disponibel online y por wordo yena via di nos website. Despues di print e formulario mester firme y entrege cu e documentonan adicional relevante. Pa yuda e cliente, cada formulario ta bin cu un splicacion con pa yene corectamente. Actualmente esaki ta disponibel solamente na Hulandes, pero lo ofrece esaki na Ingles, Papiamento, y SpaƱo pronto.

Registro online
E registro online a upgrade varios elemento. Awor e ta ofrece mas informacion cu e website anterior. KvK lo sigi upgrade e informacion disponibel, ofreciendo e cliente informacion mas amplio, di cual den futuro algun lo ta disponibel pa un suma minimo. Pa negoshi y organisacionnan cu ta usa e registro online frequentemente tin e posibilidad pa registra pa aceso continuo sin mester di yena datos di nobo. Den futuro lo ta posibel pa order un uittreksel version digital banda di esun den hard copy.

Informacion pa negoshi
Hopi hende cu ta bishita e website actualmente ta en busca di informacion tocante con pa cuminsa un negoshi y otro tipo di informacion cu tin di haber cu hacimento di negoshi. Pa e website nobo a compila varios pregunta cu KvK ta ricibi frequentemente via emails, telefoon of personal den Frequently Asked Questions (FAQ) y nos a upgrade e seccion di Business in Aruba. Tambe den “downloads” tin hopi informacion publica manera leynan relevante, documentonan di KvK, comunicado di prensa, rapport y nos newsletter Chamber News & Views.

Haci bo cita online
Awor por traha cita online door di djis wak e timeslots cu ta disponibel, click y manda bo peticion. E cita ta wordo reserva di biaha den e agenda di e persona cu lo atende bo y un confirmacion lo wordo manda pa bo automaticamente.

Pago via bo smartphone
Cu tecnologia y internet disponibel, nos no por laga afor e oportunidad pa haci pago directamente for di bo cellular, banda di e posibilidad di efectua pago via credit card despues.

Mas y mihor servicio
Mihor accesibilidad, facilidad di uso, spaar tempo y e posibilidad pa por ofrece e cliente, local y internacional servicio 24 ora pa dia 7 dia pa siman, ta nos motivacion pa introduci un mihor website y pa keda inova. Bishita e www.arubachamber.com nobo y comparti bo opinion cu nos.


Aruba, 1 juli 2011
Camara di Comercio y Industria (KvK)

 

By orbitalnets.com