Connect to Us LinkedIn Youtube RSS

11-2011 - Destination Innovation: conoce companianan inovativo y gana premio
  • PDF
  • Print
  • Email

Oranjestad, 25 di mei 2011 - Falta un paar di dia so pa e gran expo internacional “Destination Innovation” cuminsa. E biahe inovativo aki ta cla pa sali for di Renaissance Convention Center ariba diabierna 27 di mei pa 2’or di atardi, unda e lo sigui te cu 6’or y despues e biahe lo continua ariba diasabra 28 di mei di 10’or te cu 6’or di atardi. Camara di Comercio y Industria (KvK) ta contento di por conta cu participacion di varios compania di Aruba, Curaçao, Boneiro, Merca y Colombia. Inovador di noticia 24ora.com y Aruba Social Media online media specialist, ta e sponsornan di e evento grandi aki.

Kico lo tin?

Bin presencia e lanzamento di producto y servicionan nobo, e mihor proyectonan di e “Science Fair” di EPI Ciencia y Tecnologia, presentacionnan di diferente producto y servicio inovativo. 24ora.com lo percura pa live streaming di e evento riba nan website. Aruba Social Media lo filma bishitantenan di e evento pa post e video aki riba Youtube.com despues. E video aki tambe lo ta disponible despues na KvK. Y naturalmente lo tin diferente door prize.

Gana premio

Bo carchi di entrada, un boarding pass pa bo buelo cu destinacion Inovacion, tambe ta bo ticket pa participa den un tremendo rifa. Cada ora lo tin premio pa esnan presente. Varios participante di e evento ta regalando premionan atractivo. Entre otro Setar ta rifa un iPad, Caribirth ta rifa photo shoots, Tiara Air ta ofrece un ticket pa Corsow, por gana facial di Indira’s Skin Care, Quality Dishware ta ofrece entre otro set di porcelana y Fantastic Garden a sponsor un set di Strea di nos cura. En total tin 25 premio disponible.

Ken tur ta presente na Destination Innovation

Pa haya sa adelanta ken e participantenan di e exposicion internacional aki ta, bishita nos website, www.arubachamber.com pa wak tur e companianan y e number di nan booth. Alaves tuma nota di e orario di e presentacionnan duna door di entre otro Medwork, Profidd, Adapted Happy Wheels, Hitess, KR Global, Office Systems, Aruba Free Zone, Twinfield, Aruba Software Application y Universidad di Aruba.

Entrada

Entrada pa e biahe aki ta unicamente 5 florin. Mucha te cu 12 aña y tambe studiantenan ta paga Afl. 2,50 so. Companianan interesa pa cumpra carchi di entrada pa nan empleado of clientenan por pasa libremente na KvK pa cumpra nan entrada adelanta. Tambe por tuma contacto cu KvK pa haci pedido na tel. 582.1566 of via nos facebook page, www.facebook.com/arubachamber.

Sigi nos ariba www.facebook.com/arubachamber

Pa keda na altura di e exposicion interesante aki y comunica directamente cu KvK tocante Destination Innovation, djis añadi nos ariba facebook, www.facebook.com/arubachamber pa no falta ningun informacion.

 

By orbitalnets.com