Connect to Us LinkedIn Youtube RSS

06-2011 - Decreto di dia liber no twt necesario
  • PDF
  • Print
  • Email

Oranjestad – Directiva di Camara di Comercio y Industria ta participa, en vista di e multiple yamadanan di comercio y otro instancia, en busca di claridad tocante e mitar dia liber formal publica pa Gobierno di Aruba, lo siguiente: KvK no a ser consulta y no ta na altura di e base legal riba cual e decision ta funda. Como cu e instancianan gubernamental ta cera pa motibo di e dia liber cu gobierno a concede su trahadornan, no ta posible na e momento aki haya un splicacion formal cu nos por comunica na e comerciante y ciudadanonan cu ta acerca KvK en busca di informacion. Esaki a crea problema caba pa e comerciantenan cu lo mester formalmente di un permiso pa tene nan negoshi habri bao di Landsverordening Winkelsluiting, cual ta regla e orario permisible pa tienda. Tin varios empresa cu no por cera ya cu nan tin contract pa cumpli cu tercera persona, loque ta hinca nan den un situacion bastante fastioso.

Alternativa

KvK ta lamenta cu den e toma di decision aki no a considera tur elemento y tur alternativa. KvK no ta considera necesario pa a decreta un mitar dia liber oficial. Como cu e scolnan tabata liber caba, lo tabatin varios mayor cu a tuma liber tambe pa ta na cas cu nan yuinan. Por a haci un apelacion riba dunador di trabao pa coopera pa e mayornan cu tabata desea esey tuma un dia, of mitar dia liber, ya cu tur persona cu ta traha tin legalmente 15 dia liber pa aña.

No tabata necesario pa decreta cierre di henter comercio y industria, mientras cu durante otro evento di mayor escala di carnaval, no ta tuma lugar clausura di henter economia. Como por ehemplo durante e parada grandi na San Nicolas riba diasabra atardi, no ta decreta cierre di henter economia. Tur negoshi cu ta desea di ta habri e dia ey ta haci esey libremente. Durante parada grandi na Oranjestad riba diadomingo naturalmente tur empresa cu ta cera diadomingo normalmente no tin ningun problema, pero e empresanan cu sí ta habri, por keda habri sin obligacion di recuri na e gastonan extra cu ta bin awor pa e empresanan.

Decreta un dia liber oficial, si esey ta e caso, tin como consecuencia cu tur empresa, no solamente tienda, mester ta cera dialuna despues di 12:00 or. Esaki ta parce un medida desproporcional, cu ta obliga henter economia, tambe sectornan manera construccion, pa cera of absorba e gastonan adicional cu e situacion ta confronta nan cune. KvK ta di opinion cu siguiente biaha cu surgi un situacion parecido, lo ta bon pa analisa e asunto mas detenidamente, tumando na cuenta e elementonan cu a ser ignora den e caso aki. Den e caso aki, lamentablemente no a yega na un decision equilibra, cu a tuma na cuenta suficientemente interes di e empresario. Pa gobernacion ta relativamente facil pa decreta un dia liber pa su empleadonan, ya cu esaki no tin consecuencia pa su estado financiero, pero pa comercio e situacion ta diferente.

Aruba, 28 di februari 2011
Camara di Comercio y Industria (KvK)

 

By orbitalnets.com