Connect to Us LinkedIn Youtube RSS

13-2014 - Camara di Comercio preocupa pa finanzas publico.
  • PDF
  • Print
  • Email
Oranjestad – Camara di Comercio y Industria di Aruba ta sumamente preocupa pa e situacion financiero general di gobernacion, y specialmente pa cu e negociacion andando entre gobierno di Aruba y e sindicatonan cu ta representa empleado publico.
Camara di Comercio ta apoya e pensamento di gobierno cu edad di pension pa empleado publico mester bay 65 aña tambe, mescos den sector priva. Mester laga esaki tuma lugar preferiblemente den mesun proceso manera edad lo bay subi pa sector priva pa loke ta AOV, entre 2015 y 2024. Di e manera aki e momento cu e empleado publico sali cu pension di gobierno lo ta e mesun momento tambe cu e por cuminsa cobra AOV. 
 
KvK tin comprension pa deseo di gobierno pa restructura e fondo di pension, unda gobierno ta apoyando e fondo (APFA) awor cu su contribucion di dunador di trabao na un manera insostenible. E situacion actual, den cual pa cada florin di salario, gobierno ta poniendo mas di 30 cent, no por bay keda asina. Pa haci un comparacion: den sector priva na Aruba awor tin un areglo di pension obligatorio, unda pa cada florin di salario, e dunador di trabao y e empleado ta paga cada un 3%, es decir 3 cent. Esaki riba e 14,5% di prima di AOV cu e dunador di trabao y e trahador ta paga. 
E pago grandi extra di prima aki, cu gobierno ta usa pa beneficia e trahador publico, ta bin di fondonan di belasting y por lo tanto tur ciudadano ta contribui na esaki.  Logico cu mester bin anto un reforma den e sistema di pension, cu lo haci esaki menos atractivo pa e empleado publico, pasobra sea e ta haya menos pension, of e ta bay paga mas prima e mes. 
 
Loke Camara di Comercio no ta comparti ta e pensamento cu pa bay di acuerdo, empleadonan publico lo mester haya un recompensa den forma di indexering. Simplemente bisa e situacion financiero di gobierno ta asina alarmante, cu duna aumento di salario (indexering) na e momento aki lo significa nada mas ni nada menos cu bay fia mas hopi placa atrobe. Esey na un momento unda ta di suma importancia pa baha gasto, specialmente gasto di personal, pa percura pa e suma cu mester fia ta mas abao posible. A pesar di esaki, en todo caso gobierno di Aruba lo mester fia en total un suma considerable e aña aki atrobe, cu por lo menos lo ta entre 300 y 400 miyon florin. 
 
No mester lubida cu, manera Camara di Comercio a ilustra den su presentacion dia 15 di april ultimo, gobierno ta gastando awe como 140 miyon mas na gasto di personal cu na 2009. Pagando alrededor di 7500 salario pa luna, esaki ta significa un gasto extra di como 18.000 florin pa aña, pa persona, cu ta ricibi salario di caha di gobierno.E trahador den sector priva den e mesun periodo aki no a mira un adelanto asina den su cartera. 
 
Ta importante den nos pais pa ora ta reparti beneficio di loke nos pais ta produci, mantene un cierto grado di razonabilidad. Ademas ta importante, na momento cu nos ta bao di escrutinio di instancianan internacional cu mester huzga riba nos situacion economico y financiero, pa no duna un señal robez creando e impresion cu “tin mas pa haya”. Si gobierno su problema principal ta e nivel di gasto di personal, no ta logico pa toch bay aumenta esaki. 
 
       
Aruba, 08 di mei 2014
Camara di Comercio y Industria (KvK)
 

By orbitalnets.com