Connect to Us LinkedIn Youtube RSS

08-2014 - Camara di Comercio ta informa
  • PDF
  • Print
  • Email

Oranjestad, 20 di maart 2014 – Camara di Comercio e Industria Aruba (KvK) ta desea di recorda tur empresario riba algun asunto importante pa nan.

Tur diamars non-stop te 8:00 pm
Den cuadro di mehoracion continuo di nos servicio na empresario y publico en general, KvK ta habri tur diamars di 8’or di mainta te 8’or di anochi. Esaki ta un pilot project unda cu KvK ta ofrece servicio cu ta inclui sesion di informacion y registracion di negoshi nobo. Registracion pa esaki ta a base di cita. Tambe por busca y/of bestel diferente documentonan manera uittreksel, declaracion, etc.

Pues nos orario nobo ta:
Dialuna, diaranson, diahuebs y diabierna di 8:00 am – 4:30 pm.
Diamars di 8:00 am – 8:00 pm. Diamars caha ta cera 7:45 pm.

Entrante 1 april, solamente formulario nobo
Desde diamars 1 di april 2014, KvK no ta acepta formulario di registracion bieu mas. Esaki ta conta pa tur tramite, di registracion, cambio y cancelacion. E formularionan corecto ta disponible ariba e website www.arubachamber.com/forms of na balie na KvK.

Deposito di relato financiero y registro di accionista
Aña pasa, 2013, tur NV, VBA y AVV a haya e obligacion legal di deposita nan relato financiero anual y copia di nan registro di accionista na KvK. Pa esnan cu tin e aña fiscal ta core di januari pa december, e deadline pa aproba e jaarrekening ta dia 31 di augustus, tur aña.

En vista di e multiple preguntanan cu KvK ta ricibi, nos ta desea di publica un vez mas e reglanan principal pa deposito di cuenta anual y di copia di registro di accionista.
- E relato financiero mester ta deposita dentro di ocho luna despues cu e aña fiscal termina. E relato financiero mester ta aproba pa asamblea di accionista y deposita na KvK dentro di ocho dia despues di aprobacion.
- Si acaso e compania no ta alcansa mas pa logra aprobacion promer cu e deadline, por entrega e relato financiero, sin aprobacion di e asamblea di accionista, pero si firma pa tur director, na KvK pa por cumpli cu e deadline.

Extension di periodo di aprobacion di cuenta anual
Si e director(nan) di e compania no ta logra presenta e relato dentro di ocho luna despues cu e aña fiscal termina na asamblea di accionista, nan por pidi un extension di e periodo na e asamblea, esaki te un maximo di seis luna.
Mescos cu tur asamblea di accionista, e compania tin e obligacion pa notula e reunion den cual e decision a ser tuma pa prolongacion . E director(nan) tin cu warda e notulen na oficina di e compania.

Tuma nota cu no ta pidi e extension na KvK, sino na e accionista(nan). KvK ta e instancia designa pa warda e relato financiero di cada compania. KvK no ta e instancia cu ta recibi peticion pa extension y KvK no ta otorga e extension tampoco.
Sin embargo KvK ta ripara cu varios compania no a entrega nan jaarrekening ainda. Mientras tanto e periodo maximo di extension tambe a vence pa e companianan cu aña fiscal di januari te december tambe a vence na fin di februari 2014.

Obligacion pa deposita registro di accionista
Ademas di e relato financiero anual, tur NV, VBA y AVV mester entrega tambe un copia di nan registro di accionista (aandeelhoudersregister) na KvK. E directiva di e compania ta rekeri pa mantene e registro up to date. E periodo pa entrega copia di registro di accionista ta vence ocho luna despues di cu aña fiscal termina. Pa compania cu aña fiscal di januari pa december e periodo a vence caba fin di augustus 2013. No tin posibilidad legal pa extende e periodo aki manera den e caso di e relato financiero.

Ta urgi esnan cu no a cumpli ainda cu un of ambos di e obligacionnan legal aki, pa haci esey mas pronto cu ta posible.

Tur empresario cu tin cualkier duda of ta desea di sa mas tocante e proceso nobo aki, por tuma contacto libremente cu KvK na 582-1566 ext. 35/30/22/21. Tambe por consulta nos website pa mas informacion,www.arubachamber.com/business-in-aruba/filing-of-the-annual-financial-statement.

Aruba, 20 di maart 2014
Camara di Comercio y Industria (KvK)

 

By orbitalnets.com