Connect to Us LinkedIn Youtube RSS

05-2014 - Aruba ta caro pa inversionista
  • PDF
  • Print
  • Email
Oranjestad - Recientemente, hopi comentario a ser scucha tocante e hecho cu Aruba ta aparece como e pais cu e porcentahe mas halto na mundo di impuesto riba entrada personal. Cu casi 60% como tarifa maximo, sin duda algun nos ta riba henter internet como e campeon mundial. Naturalmente esnan cu conoce e materia aki bon, ta na altura cu e porcentahe aki ta aplica solamente den caso excepcional di entrada masha halto mes.
 
Pero den e asunto aki tambe, apariencia ta mas importante cu e realidad su tras. Y como agravante, e noticia aki ta sali hustamente na momento cu Aruba ta haciendo esfuerzo grandi pa posiciona su mes como ‘gateway’, como intermediario den comercio internacional, specificamente entre Sur America (y Caribe), y Europa. Envez di lamenta henter e situacion aki, laga nos considera esaki un bon ocasion pa nos tira un vista riba kico nos tin na positivo, y negativo, pa nos por realmente crea un sector economico nobo, manera ta deseo tanto di gobierno como sector priva.
 
Nos tin na nos ventaha: un tremendo clima tropical, base pa un turismo solido. Nos ta pertenece na Reino Hulandes, loque ta duna cualquier empresario seguridad encuanto su derecho como persona o empresa den nos sistema hudicial. Nos tin disponible un forza laboral cu conocimiento y bon prepara, cu dominio di varios idioma, a pesar cu nos tin cierto reto di enfrenta pa mehora nos sistema di educacion den cierto area. Nos tin un bon sistema di telecomunicacion, y di conexion maritimo y aereo. Nos posicion geografico en principio ta favorable pa ta intermediario den nos region, aprovechando e bon comunicacion aki.
 
Kico mester mehora?
Manera menciona caba, nos ta desanima posible inversionista, sigur esun di exterior, cu un inkomstenbelasting asina halto. Pero tin mas asunto: cada empresario ta confronta un sistema intransparente y complica di impuesto: BBO, winstbelasting, dividendbelasting. Riba esaki, ainda nos tin un areglo especial (IPC) pa empresanan califica, bao di cual nan por haya rebaho considerable di impuesto riba ganashi. E areglo aki ta complica y ta varia di aña pa aña den loque e beneficionan ta, di manera cu e empresario no tin seguridad a largo plazo, kico e mester paga. Ademas e ta elitario y no ta crea un “level playing field” pasobra mayoria di empresario no ta califica pa haye.
 
Nos tin te awe ainda un sistema di atende un permiso tras di otro, loque ta haci cu un empresa cu mester di mas di un permiso, no por cuminsa tramita tur na mesun momento, y mester warda te ora e haya esun promer, pa sigui pa e otro. Di e manera aki e procesonan di haya permiso ta bira sumamente largo. Algun aña pasa caba un comision di Dialogo Social, den cual KvK a participa, a analiza e situacion aki, mirando e posiblidadnan di crea un “one stop shop” pa empresa, unda ta centraliza tur peticion y corta tempo necesario pa yega na cierto permiso. Lamentablemente, despues di entrega di e rapport aki, nada mas a sucede cu e recomendacionan. Pa esnan
interesa, e rapport aki ta disponible riba website di KvK: http://www.kvk.aw/images/pdf/Reports/Social_Dialog/rapport%20one%20stop%20shop.pdf
 
Tarifa impuesto di importacion
Nos tin tambe tarifanan di aduana cu ta un selva di diferente porcentahe, varios di nan ainda un herencia di tempo cu nos tabata pertenece na Antiyas Hulandes, unda tabatin un politica di proteccion di cierto industrianan, mayoria e tempo ey estableci na Curaçao. For di noticia di ultimo dianan nos por comprende cu ministro di Finanzas lo bay haci un esfuerzo pa mehora relacionnan interno den Cuerpo di Aduana, poniendo mas poder di decision den man di empleado y menos den man di gerencia. E bon intencion aki sin embargo lo no fructifera, si no bin un simplificacion di e sistema di tarifa, cual lo por pone un fin na hopi discusion entre empresario y aduana, causando tardanza, y tardanza ta causa extra gasto promer cu mercancia sali, cu finalmente ta resulta den prijs mas halto pa e ciudadano paga.
 
Cost of doing business
E empresario, stranhero o local, ta haye confronta tambe cu un peso grandi di prima social, entre AOV/AWW, ZV/OV, AZV, seguro obligatorio di pension pa sector priva, cu ta montona na mas di 30% riba cada florin di salario bruto. Nos ta yegando na e limite maximo cu nos por maneha, no solamente for di punto di vista di e empresario, sino tambe di e empleado cu bon salario, cu mester carga e peso grandi di e fondonan cu nos a crea den entre otro pension y cuido medico.
 
Mihor servicio na empresario
Ademas nos tin e problema di tramite di un variedad grandi di asunto cu tur empresario mester haci cerca varios entidad gubernamental, relaciona cu tur e permisonan general y special, necesario pa opera un cierto empresa. Por lo general e tramitenan ta demasiado lento, costoso y intransparente. Esfuerzo grandi a ser haci den e ultimo añanan na cierto instancia pa remedia esaki, entre otro Asunto Economico, Censo y SIAD, pero ta keda hopi pa mehora ainda. E tramitenan aki ta toca tambe e ciudadano individual, cu hopi biaha ta yega na e mesun loket pa servicio.
 
KvK ta contento di tende cu nos ministro encarga cu Finanzas y Recurso Humano, a tuma como reto e restructuracion di aparato gubernamental, deseando di converti esaki den un organismo “di cinco streya” dentro di algun aña. Aunque esaki ta un meta hopi ambicioso, ta di spera cu esaki por logra y no keda limita na cambio den proceso interno so di e departamentonan, sino cu tambe por resulta den mehoracion drastico di servicio na empresario, y na publico en general.
 
 
Aruba, 06 di februari 2014
Camara di Comercio y Industria (KvK)
 

By orbitalnets.com