Connect to Us LinkedIn Youtube RSS

11-2013 - Deposita Relato Financiero y Registro di Accionista
  • PDF
  • Print
  • Email

Oranjestad – Entrante 1 di februari di e aña aki tur NV, VBA y AVV tin e obligacion di deposita nan relato financiero anual (jaarrekening) na Camara di Comercio y Industria Aruba (KvK). E obligacion aki ta un di e exigencianan di FATF pa aumenta control y supervision ariba e companianan aki.
Pa esnan cu e aña fiscal ta core di januari pa december, e deadline pa aproba e jaarrekening tabata dia
31 di augustus 2013. En vista di e multiple preguntanan cu KvK ta ricibi, nos ta desea di publica un vez mas e reglanan basico pa cu deposito di cuenta anual y di copia di registro di accionista.

Extension di periodo di aprobacion di cuenta anual
Si e director(nan) di e compania no ta logra presenta e relato dentro di ocho luna despues cu e aña fiscal termina na nan asamblea di accionista, nan por pidi un extension di e periodo na e asamblea, esaki te un maximo di seis luna. E reunion di accionista ta decidi si ta honra peticion di directiva pa entrega e jaarrekening mas laat pa aprobacion. Dentro di ocho dia despues di aprobacion di e relato anual esaki mester keda deposita na Camara di Comercio.
Mescos cu relato di tur asamblea di accionista, e compania tin e obligacion pa notula e reunion den cual e decision a ser tuma pa prolongacion (uitstel). E director(nan) tin cu warda e notulen na oficina di e compania.

Tuma nota cu no ta pidi e extension na KvK, sino na e accionista(nan). KvK ta e instancia designa pa warda e relato financiero di cada compania. KvK no ta e instancia cu ta recibi peticion pa uitstel y KvK no ta e instancia cu ta otorga e uitstel tampoco. Sin embargo KvK ta ripara cu e compania no a entrega su jaarrekening. Pesey ta consehable, den caso cu e directiva di e NV, AVV of VBA haci peticion pa uitstel na su asamblea di accionista, pa notifica KvK di e decision aki, por ehempel depositando copia di e notulen na KvK.
E decision pa duna prolongacion por ser deposita na KvK, hunto cu formulario 16 y identificacion valido di un director.

Obligacion pa deposita registro di accionista
Ademas di e relato financiero anual, tur NV, VBA y AVV mester entrega tambe un copia di nan registro di accionista (aandeelhoudersregister) na Camara di Comercio. E directiva di e compania ta rekeri pa mantene e registro up to date. Mester warda e registro na e adres di e compania of na e oficina di e representante legal. E periodo pa warda e documento ta diez aña y tur accionista tin derecho di revisa e registro.
Durante henter aña tin cu mantene nomber di e accionistanan y copia di nan identificacion. Tambe nan adres, tipo di accion, derecho di voto, suma deposita y fecha adkeri mester ta registra.

Contenido di e relato financiero anual
E documento mester contene e aspectonan basico di un relato financiero, esta:
- e mester inclui un balanza;
- e mester inclui cuenta di beneficio y perdida;
- e mester inclui un memoria explicativo.

Tene cuenta cu pa e relato financiero tin validez, e mester tin firma di cada miembro di e directiva y cada miembro di e junta di comisario, si esaki ta aplicable, di e compania. E directiva ta firma e documento despues cu e accionistanan aproba e relato financiero durante un asamblea di accionista. Esaki mester sucede dentro di ocho dia cu e documento keda cla.

Procedura pa deposita relato financiero na KvK
Despues cu e relato financiero keda aproba pa e accionistanan, y firma pa e directiva y e junta di comisario, mester deposita esaki hunto cu un copia di e registro di accionista, y formulario 16 na KvK.

E relato financiero y e registro di accionista no ta pa publico mira, a menos cu e compania ta desea esaki.

Tene cuenta cu e ley nobo ta introduci varios sancion pa yuda KvK eherce su tarea di warda e documentonan y e supervision di e proceso. Esaki ta inclui aumento di boetnan existente y control mas severo. Den un otro comunicado KvK lo splica mas den detaye tocante e control y sancionnan nobo.

Tur empresario cu tin cualkier duda of ta desea di sa mas tocante e proceso nobo aki, por tuma contacto libremente cu KvK na 582-1566 ext. 35/30/22/21. Tambe por consulta nos website pa mas informacion, www.arubachamber.com/business-in-aruba/filing-of-the-annual-financial-statement.

Aruba, 8 di october 2013
Camara di Comercio y Industria (KvK)

 

By orbitalnets.com