Connect to Us LinkedIn Youtube RSS

04-2012 - Historia mester ta parti di nos futuro?
  • PDF
  • Print
  • Email

Oranjestad – Riba cualkier dia di siman, tanto hopi hende local como turista, ta mira nan paseo riba nos isla termina riba Sero Colorado, e punta mas pariba di nos isla. Desde aki nan por goza, si tempo permiti, di un vista riba e costa Venezolano, como 15 miya mas leu. Algun ta laga nan vehiculo atras aki pa bay na pia na e brug natural bon scondi na pia di e sero. Fuera di esey, aparentemente no tin tanto di mira na e lugar ey. Of toch? De vez en cuando un persona local por haya e pregunta di un turista, kico e platformnan straño di beton den forma di circulo ta, o tabata. Lamentablemente, mayoria di nos ciudadanonan mes no sa cu e structuranan di concret aki ta representa un parti masha importante di nos pasado, pa ser exacto e temponan scur di Segunda Guera Mundial, cu no a pasa sin cu e parti chiquito aki di Hemisferio Occidental a ripara esey. Riba e platformnan aki tabatin instala cañonnan masha grandi cu tabata capaz di cubri gran parti di e lama entre Aruba y peninsula di Paraguaná. Otro cañon similar tabata instala na Yuana Morto, na e lugar conoci como “Kustbatterij”. Hunto cu un puesto di observacion riba Sero Alejandro, e cañonnan tabata forma un parti importante di e defensa contra e atakenan cu tabata spera di banda di marina alemán riba e refineria pa su importancia pa e forzanan alia. Pa aporta den e defensa, a lanta e cuerpo militar local yama “Schutterij”, den cual hopi di nos hobennan di e tempo ey a participa, hunto cu personal militar Britanico, y despues Mericano.

Dia 16 di februari 1942, e atake a tuma lugar finalmente. Un submarino aleman a cuminza lanza torpedo riba e tankeronan dilanti y den haf di e refineria, y a trata di causa daño na e refineria mes lanzando granada riba e instalacionnan. Afortunadamente, no a haci daño mayor na e refineria mes, loque lo tabata un desastre sin igual, pero riba lama e consecuencianan tabata severo. Cuatro tankero, Oranjestad, San Nicolas, Pedernales y Tia Juana a keda torpedea y a sink, mientras cu e atake a costa un total di 47 bida bao di tripulacion di e barconan envolvi. Algun dia despues un torpedo lanza pa e submarino aleman a termina riba tera na Eagle, unda e intento pa desmantela e proyectil a costa cuatro bida entre e militarnan hulandes, ora cu el a explota riba nan. Curiosamente e evento ultimo aki a keda mas conoci cerca publico en general como parti di nos historia reciente cu e ataque riba e refinería, cu sin duda algun ta categoriza como e catastrofe mas grandi den nos historia, cu e cantidad mas grandi di bida humano perdi.

Como consecuencia di e atake, mayoria di e poblacion cu tabata biba cerca di e refineria a huy bay mas leu parti paden di e isla, drumiendo den y rond di e casnan di esnan cu tabata biba ey pa varios siman, compartiendo cuminda y otro articulo den e tempo ey di scarsedad grandi pa motibo cu e situacion di guera tabata afecta abastecimiento di e isla. Pa nos suerte, pa e resto di e guera marina Aleman a resulta incapaz pa lanza otro atake y e refineria a continua contribuyendo grandemente na e demanda di e forzanan alia pa loque ta combustible, especialmente gasolin di aviacion, yegando na cierto momento hasta na produci 80% di e gasolin consumi pa e forzanan uni contra Alemania y Japon.

E sitionan historico cu por conta nos di nos pasado aki, awendia no ta conta cu ningun indicacion pa su bishitante di loque a pasa tanto aña pasa, unda no unicamente Arubiano tabata envolvi, sino tur e nacionalidadnan cu tabata traha y biba aki, tanto militar como trahador na e refinería, cu a comparti e temponan difícil aki, cu miedo pa otro ataque, sperando final di e guera asina desastroso pa henter mundo.
Na bispo di e fecha histórico di 16 di februari, awor net setenta aña pasa cu Aruba a experimenta su momentonan mas espantoso y cu un perdida sin precedente di bida humano, nos no mester haci algo mas pa recorda esaki cu nos a haci te awor?
Lo no ta bon si nos duna e lugar aki riba e sero, unda anualmente miles di hende local y turista ta termina nan trip di e dia ey, algo pa nan pensa y recorda kico a sucede tanto aña pasa, conservando loque tin ainda? Aparte di e consideracion cu nos mester educa nos mesun hendenan pa loque ta nos historia, nos no ta observa un tendencia creciente den turismo mundialmente, unda mas y mas turista no ta solamente interesa den solo, beach, bon cuminda y entretenimiento, pero ta desea di conoce algo mas tocante e pais cu nan ta bishitando, di su historia y cultura? Cuanto di nos sitionan historico ta conta cu algun borchi of piedra conmemorativo cu ta splica grandi y chiquito, stranhero y local, kico tin di importancia eynan?
Na e momentonan aki, cu kizas Aruba mester bay re-inventa su mes economicamente, den caso di perdida di e refineria, lo no ta bon pa combina loque ta educativamente corecto y cu de paso economicamente ta “ make good sense”? Ban duna e sitio aki, cu ta simboliza e unico lugar riba henter nos continente Americano cu a ser ataka den henter e guera mundial, e lugar cu e merece entre nos mes, y tumando na cuenta e interes entre nos huespednan tambe.

Nota: un palabra di aprecio ta bay na Adolf Kock, Edric Croes, Evert Bongers, Samuel Ramada y Jorge Ridderstaat pa nan aporte y ayudo cu material fotografico.


Camara di Comercio y Industria Aruba
15 Februari 2012

altaltalt

 

By orbitalnets.com