Connect to Us LinkedIn Youtube RSS

36-2018 - KvK ta parcialmente di acuerdo cu cobransa pa cubri gasto di procesa sushi
  • PDF
  • Print
  • Email
Oranjestad – Algun siman atras Camara di Comercio y Industria Aruba (KvK) a reuni cu Minister di Desaroyo Teritorial, Infrastructura y Medio Ambiente, sr. Otmar E. Oduber pa discuti riba e maneho di desperdicio y cobransa. Minister a duna un amplio splicacion di e problematica di e gastonan cu ta bin acerca pa pais Aruba, si nos kier cera dump y procesa nos desperdicio di manera responsabel. KvK ta mira e importancia di un bon maneho di desperdicio y e responsabilidad cu esaki ta bin cune. KvK a expresa su comprension pa e situacion dificil aki y e propuesta di cobra e ciudadano y empresanan pa e servicio nobo aki.
 
KvK en principio no ta di acuerdo cu e proposicion di Minister Oduber pa laga tur cuidadano carga e responsabilidad aki via di un cobransa na cas of pa negoshi. KvK a trece padilanti un solucion alternativo di cobransa pa volumen ora e drenta Aruba. No ta haci diferencia si ta pa negoshi of no. Esun cu uza ta paga. KvK ta sugeri cu e impuesto aki mester ta un solucion anticipatorio na e pakete di impuesto cu lo forma parti di e reforma fiscal. No mester warda e reforma aki bin cla.
 
Impuestonan pa cubri gasto di recoge sushi no ta nada nobo
Semper desde fin di añanan 1920, servicio di recoge sushi tabata un parti integral di servicionan basico di Gobierno di Aruba, igual na servicionan di siguridad (polis), enseñansa (maestronan di scol) y obranan publico (traha y drecha caminda). Despues di casi un siglo, a cambia esaki pa un subsidio directo di Gobierno pa Serlimar for di e Algemene Middelen.
 
Awor tin un situacion caminda nos no por sigui tira sushi na dump mirando cu e gastonan adicional di procesa, recicla, y dispone di e desperdicio aki mester di un forma pa paga nan. Dump no por sigui crece y contamina nos medio ambiente, pues mester procesa sushi di un manera responsabel.
 
Propuesta di KvK: cobra na frontera pa e desperdicio pa importacion di producto paketa 
E propuesta nobo ta encera un impuesto fiho pa cada unidad sin mira balor di mercancia. Un prijs pa cada paki individual di likido of producto, pa cahanan di carton of plastic y caha cu mercancia consolida. E cobransa ta wordo haci na waf of aeropuerto uzando informacion basico cu ta aparece den tur factura. E empleado publico ta haci un calculacion di e cantidad y ta multiplica cu e tarifa. E suma aki lo wordo inclui pa cobra pa importa e mercancia. 
 
KvK a trece dilanti como ehempel cu si cobra 7ct pa un botter di tur likido cu drenta Aruba, sea ta pa bebe, uso domestico y tambe botter di producto fabrica na Aruba, e por genera algo mas di 7 miyon florin pa aña. E lo ta un fuente di ingreso continuo y stabil sin tin mester di crea un administracion di cobramento nobo. Lo scapa gasto di gobierno of compania di utilidad encarga y tambe spaar papel di recibo cu ta acumula na minimo di 35 mil cas pa luna segun calculacion. E ingreso aki lo por cubri tur e gastonan extra di procesa sushi. Beneficionan di e cobransa aki ta cu no tin fayo den cobransa, no tin pagonan atrasa, no tin discusion si e cobransa ta husto segun produccion di desperdicio. Como cu ta cobra e placa di adelanta, ta duna Serlimar un cashflow positivo y confiabel. Tambe por cera contract di termino largo cu empresanan pa baha e suma di impuesto aki y haci di e cobransa un financiamento atractivo pa un negoshi cu ta estableci. 
 
Cobra pa cas of negoshi no ta e forma mas husto pa e pagador individual
Ningun situacion di cas pa vivienda ta mescos locual ta haci cu consumo y e produccion di desperdicio ta varia pa cas. Mesun cos ta conta pa negoshi. Un arkitecto por ehempel ta produci relativamente menos sushi cu un supermercado of un restaurant. Cobra pa volumen, y na frontera, ta un forma husto, mas suave y cu menos costo pa administra. Basicamente esun cu produci mas desperdicio ta paga mas. Hopi desperdicio ta bin di consumo di turistanan. Nan ta come afo mas cu e local, por lo general ta bebe awa emboteya entro otro y pues ta crea mas desperdicio. E contribucion di sector turistico lo alivia e peso pa e cas di famia y negoshinan local.
 
Implementacion por wordo efecua na termino corto
Similar na otro cambionan di impuestonan den pasado, esaki por tuma luga cu un Ministeriële Beschikking y wordo implementa inmediatamente, sin mester warda ariba e legislacion. E cambio ta implementacion di un tarifa cu un cambio den “Landsverordening In, uit en doorvoer”, entre otro.
 
A largo plaso KvK a conseha Minister Oduber riba algun ideanan cu ta encera introduccion di incentivonan fiscal pa alivia e peso adicional pa comercio na waf y aeropuerto pa mercancia importa den mercado. Incentivo fiscal di kita invoerrechten pa ekiponan pa negoshinan di reciclahe ta un sugerencia concreto.
 
Nos comunidad mester bira mas consciente riba nan uzo y con mester maneha desperdicio, parti di e fondonan nobo aki mester bay pa stimula separa y recicla, sin cu e mester yega Serlimar. Menos nos produci, ta menos gasto pa Serlimar y menos impuesto mester cobra pa un volumen mas abou di sushi. 
 
KvK ta spera cu e splicacion amplio aki aclarea su punto di bista riba e tema aki.
 
 
Aruba, 15 october 2018
Camara di Comercio y Industria (KvK)
 

By orbitalnets.com