Connect to Us LinkedIn Youtube RSS

23-2011 - KvK ta preocupa cu indexering
  • PDF
  • Print
  • Email

Oranjestad – Cu cierto preocupacion Camara di Comercio y Industria ta observando e negociacionnan cu ta tumando lugar entre gobierno y e sindicatonan cu ta representa empleado publico. Como resultado preliminar KvK ta comprende cu gobierno ta mustra comprension pa e deseo di e empleadonan publico di por conta cu ahustacion di nan salario den forma di indexering. KvK tambe tin comprension pa tanto e punto di bista di e empleado publico como esun di gobierno.
No cabe duda cu mescos tur otro hende, empleado publico tambe a sufri consecuencia di e situacion economico mundial cu a afecta Aruba durante e ultimo añanan. E aña aki posiblemente ta trece un recuperacion económico, pero esaki no ta fuerte y no ta general, y ta producto di reapertura di Valero y varios inversion cu gobierno mes a haci den proyecto. Tambe por mira cu cierto optimismo e resultadonan preliminar di nos turismo, segun e cifranan oficial publica te awor. Sin embargo, esaki no a hiba nos ainda na e nivel mas halto di produccion di 2008, promer cu e crisis a cuminza.
Desde hopi aña gobierno ta sufriendo un nivel di deficit financiero preocupante y continuo, locual a hiba nos na un debe publico di alrededor di 2500 miyon florin, loke ta representa mas di 50% di nos Producto Interno Bruto (GDP) caba. Mirando e situacion financiero di gobierno cu lo no logra ainda pa yega na un presupuesto balanza den e proximo par di aña, e pregunta mester surgi kico ta e posibilidadnan pa duna un mihor recompensa na e empleado publico.

Si nos bay analiza e presupuesto di gobierno, nos por ripara cu e gastonan di personal ta e factor mas grandi y mas problematico entre e rubronan principal. Na aña 2010 gobierno a paga un suma total di salario (di empleado publico y di institucion subsidia) y prima di pension di Afl. 602 miyon, segun cifranan publica pa Banco Central. Na mesun momento, entrada regular di impuesto pa 2010 tabata alrededor di Afl 860 miyon, excluyendo e Afl 211 miyon di entrada di BBO extra procedente di Valero. Si mester conta acerca e Afl 221 miyon di gasto di “bienes y servicio”, nos por mira cu e gastonan general di e aparato gubernamental a consumi Afl 823 miyon, loke ta representa mas di 95% di entrada di impuesto regular. Mester tuma na cuenta tambe cu den e añanan venidero no ta premira mas entrada incidental halto manera a sucede na 2010.

Pa 2011 e gastonan di empleado publico a sigui crece, entre otro pa motibo cu gobierno a reconoce e Afl. 105,- pa luna pa cada empleado, cu tabata fruto di e lucha sindical algun aña atras. Tambe mester tene cuenta cu e acuerdonan den Dialogo Social, principalmente e cambio di edad di pension pa 60 aña, cu tin su efecto positivo pa fondo di pension, pero ta trese cune cu e “natuurlijk verloop” cu ta un di e medionan principal di reduci gasto sin recuri na retira personal forzosamente, tampoco no ta mas na e mesun nivel. E empleadonan di mas experiencia y mas salario ta keda mas tempo den e aparato, loke ta preveni baha gasto. Di otro banda esaki ta haci cu nan experiencia ta keda mas largo den e aparato, cual ta bon pa operacion di gobernacion.

E buskeda di un solucion duradero pa indexering den forma di un protocol of hasta un ley di banda di e empleado publico ta comprendibel. Sin embargo mester tene cuenta cu e hecho cu solucion duradero no por tuma lugar si no tin solucion duradero pa e problema di exceso di personal cu ta hiba nos na un presupuesto gubernamental insostenible aña tras aña.

Ta di spera cu den e dianan nos dilanti gobierno y representantenan di empleado publico sigui delibera riba e tema aki, pero tumando na cuenta tambe interes general di tur trahador, tambe esnan di sector priva cu mester aporta via impuesto pa cualkier solucion cu surgi. Mirando e panorama mundial economico, cu na e momento aki por trece sea un crecimiento economico modera, o un catastrofe global si e problemanan di e situacion financiero/monetario na Europa no haya solucion. Esaki por afecta tambe estabilidad di Estadonan Uni, loke na su turno por afecta nos economia gravemente. Sano juicio ta importante pa tuma tur e factornan aki na cuenta, sigur si nos no kier hipoteca futuro di nos yiunan.

Aruba, 14 november 2011
Camara di Comercio y Industria (KvK)

 

 

By orbitalnets.com