Connect to Us LinkedIn Youtube RSS

11 - 2018 - Re fructifero entre Minister Oduber y KvK
  • PDF
  • Print
  • Email
Oranjestad – Recientemente Comision di ROP di Camara di Comercio y Industria di Aruba (KvK) a tene un re cu Minister di Infrastructura y Medio Ambiente, sr. Otmar E. Oduber, caminda a elabora riba diferente punto pa sigui desaroya e ROP (Ruimtelijk Ontwikkelingsplan) y su regulacion (ROPv).
 
Durante e re a intercambia varios punto cu ta di importancia pa desaroyo di Aruba y su economia. Minister Oduber a indica cu e ta comparti e importancia di un ROP y ta bay traha duro pa por tin e ROPv finalisa durante 2018.  A indica cu agricultura tambe ta un sector cu tin su atencion y lo sigui observa su desaroyo pa e yega na bira un pilar economico mas importante pa nos pais. Asina tambe kier stimula e desaroyo di ‘green houses’ y e cultivacion di productonan via hydroponics of otro metodonan inovativo. Tambe lo pone mas atencion pa e proteccion di area berde pa proteha nos naturalesa. E legislacion di medio ambiente tambe ta wordo considera importante den e ROP y ROPv. 
 
E proposicion pa e tereno di APA ta pa e por brinda oportunidad pa e empresario local y ta atractivo pa e por sigui wordo desaroya comercialmente y por bira un atraccion di entretenimiento pa turismo caminda por construi casnan pa local brindando servicio di calidad halto. 
 
A trece dilanti e preocupacion di e escasez di vivienda cu por wordo otorga y e cantidad grandi di peticion pa tereno cu a drenta. Tin alrededor di 12.000 peticion pa tereno y tin un escasez registra di 2.500 casnan social cu mester wordo construi. E proceso di otorga permiso pa construccion lo tin cu mehora y lo percura pa e permiso por ser otorga den 5 pa 6 siman. Unabes cu esaki ta otorga e propiedad mester haya su distribucion di awa instala y cashi di coriente conecta na e red. 
 
Gobierno semper ta informa pueblo encuanto e infrastructura y e funcion di e rotondenan. E acceso pa drenta y sali na cierto puntonan riba e Watty Vos Boulevard tin cu keda of bin. Pa stimula e experencia cultural lo trece incentivanan pa architectura diseña den estilo caribense.
 
Un punto hopi importante ta e situacion cu maneho di sushi actual y e dump na Parkietenbos. Minister Oduber a indica cu mester bin cu un solucion rapido mirando e risico grandi cu esaki ta bin cune pa salud en general. E pueblo mester wordo concientisa riba e impacto cu esaki tin riba nos salud.  Gasnan toxico procedente di dump ta peligroso y mester purba minimalisa e risiconan di enfermedadnan ya cu esaki ta afecta tur hende. Na final nos tur: Gobierno, pueblo y comercio hunto lo mester paga e consecuencia financiero.
 
KvK ta hopi satisfecho cu e atencion cu Minister Oduber a duna na e puntonan treci dilanti y KvK di su banda ta dispuesto pa contribui pa logra esakinan. Na final di e re a stipula un fecha pa un siguiente encuentro cu lo tuma luga durante e segundo siman di april. Durante e siguiente encuentro lo repasa riba e topiconan di e re aki, entre otro maneho di tereno, dump di Parkietenbos, ROP y ROPv, tereno di APA cu enfoke riba local, seguridad di rotondenan, medio ambiente y architectura cu caracteristica local.
 
 
Aruba, 9 di maart 2018
Camara di Comercio y Industria (KvK)
 
 
 

By orbitalnets.com