Connect to Us LinkedIn Youtube RSS

32-2017 - KvK a habri inscripcion pa curso empresario independiente chikito/mediano 2017-2018
  • PDF
  • Print
  • Email
Oranjestad – Ya pa 4 aña consecutivo Camara di Comercio y Industria di Aruba (KvK) ta organisando e curso Empresario Independiente Chikito/Mediano. E siguiente edicion di e curso lo start dia 16 di october proximo y por inscribi na KvK pa forma parti na esaki.
 
E curso Empresario Independiente ta diseña door di KvK y ta brinda oportunidad amplio di conocemento pa por maneha un negoshi. E curiculo ta consisti di diferente module entre nan mercadeo, legislacion, finanzas y administracion, impuesto, management, tecnica di benta, servicio na cliente, business planning y varios otro aspecto cu cual e empresario cu kier cuminsa lo cera conoci cune ora di maneha un negoshi. E curso interactivo ta yuda e empresario ta miho prepara y di e forma aki su idea di negoshi por ta mas realistico y sostenibel.
 
E guia durante e curso intensivo aki ta wordo duna door di expertonan y profesionalnan den nan ramo. Den un forma practico e cursista ta haya guia con pa bai maneha su negoshi. E docentenan lo keda den contacto cu e participante durante e periodo di e curso. Tambe nan lo ricibi coaching personal ora nan completa e curso pa asina nan por cuminsa nan negoshi. 
 
E curso tin awo un programa nobo loke ta encera cu durante e curso aki e cursistanan ta bai skirbi un business plan y tambe na final lo mester duna un presentacion di e business plan aki.
Pa forma parti di e curso e interesado mester manda un carta di motivacion hunto cu su CV. E curso ta ser duna na Papiamento y tin un duracion di 6 luna. Dos biaha pa siman lo tin les di 2 ora den e auditorio di KvK y durante e curso e participantenan lo haya e guia y informacion necesario. Participacion ta AWG 695 mas e AWG 25 pa registracion. Por paga e participacion den 2 termino di pago. Tene na cuenta cu participacion ta limita na un maximo di 20 participante pues no laga e oportunidad aki di cuminsa bo propio negoshi bay laga bo. 
 
Na final cada participante mester haci un examen teoretico pa gradua exitosamente di e curso y duna un presentacion di nan business plan. E business plan lo wordo presenta na un hurado cu ta inclui Qredits y di e forma aki e cursista cu gradua por bin na remarke pa financiamento di su negoshi via Qredits. E graduadonan lo ricibi nan certificado, cu lo tin balor comparabel cu e “middenstands-diploma” na Hulanda. KvK lo inclui den su registro cu e cursista a termina e curso Empresario Independiente cu exito y esaki lo refleha tambe den e informacion di su empresa den e registro di KvK. 
 
KvK kier gradici tur esnan cu ta coopera na realisa e curso aki: sres. Leo Maduro, Dave Martinus, Herbert Diaz, Olivier de Jong, Patrick Melchiors, Bruce Harms, Ryan Maduro, Guido Picus, Bert Vermaas, Dick Rikkengaa, Boy Ecury, Robert Lejuez, Frank Snijders, Departamento di Propiedad Intelectual (BIE) y coleganan di KvK.
 
Tur esnan cu kier participa den e siguiente curso di Empresario Independiente, of cu ta desea haya mas informacion por tuma contacto cu departamento di Business Information & Support (BIS) na This e-mail address is being protected from spambots. You need JavaScript enabled to view it of yama na 582-1566 ext. 30/35/42/27. KvK ta desea di awor esnan cu lo bay participa na e curso hopi exito y cu nan futuro planificacion di nan negoshi.
 
Aruba, 5 di juli 2017
Camara di Comercio y Industria (KvK)
 
  
 

By orbitalnets.com