Kamer van Koophandel en Nijverheid Aruba | Chamber of Commerce and Industry Aruba

05-22 – KVK A REUNI CU ARUBA FOOD & BEVERAGE ASSOCIATION (AFBA): Esencial pa alinia e puntonan cardinal

Oranjestad – Camara di Comercio y Industria Aruba (KvK) a reuni cu diferente stakeholders y recientemente a intercambia di idea cu e directiva di Aruba Food & Beverage Association (AFBA).

Den e reunion aki a bin dilanti e importancia pa tin un bon comunicacion y colaboracion entre Gobierno y e stakeholders. Pa loke ta trata introduccion di e sistema BTW entrante 1 di januari 2023, ainda e stakeholders falta di ricibi informacion clave pa por haya un miho bista di e impacto di e cambio di BBO pa BTW. AFBA a remarca cu esaki ta imperativo pa por haci un evaluacion di e preparacionnan y inversion necesario, tanto administrativo como organisatorio, pa por determina si comercio realmente lo por carga e sistema aki y ademas finalisa e preparacionnan dentro di e periodo stipula. A parte di esey, mester tene den consideracion cual incentiva Gobierno lo ofrece pa baha otro impuesto y cual otro medidanan lo introduci cu lo tin influencia riba e poder di compra di nos hendenan local ya cu e sector di F&B ta depende tambe di e mercado local.

Di un banda Gobierno a kita e sosten financiero (loonsubsidie), pero a tarda pa elimina e restriccionnan y limitacionnan cu a afecta e sector di F&B aun mas. AFBA a indica tambe cu e sector di F&B keto bay ta enfrentando retonan laboral, manera e duracion di e proceso di otorga/renoba permiso di trabao y e dificultad pa termina un relacion laboral, aun si e permiso di e trahado a vence. Tambe e fluho di trahadonan cu ta scoge pa bay traha den e sector hotelero ta forma un reto grandi.

AFBA y KvK ta desea un cooperacion mas estrecho bao di e stakeholders pa asina por intercambia informacion y asina conhuntamente por atende e preocupacionnan y puntonan di atencion comun y tambe por duna aporte y conseho na Gobierno. Cu participacion di sector priva por garantisa un miho escogencia y implementacion di puntonan cu ta regarda y tin impacto tanto riba comercio como nos comunidad en general.

 Aruba, 18 februari 2022

Camara di Comercio y Industria (KvK)

Scroll To Top