Gobierno, UA y KvK ta firma e LOI pa “Aruba como Isla di Incubacion”: Un logro grandi pa comercio di Aruba.

Oranjestad – Un di e metanan cu Gobierno di Aruba, Camara di Comercio y Industria (KvK) y Universidad di Aruba kier pa bira realidad pa Aruba ta e creacion di Aruba como un isla di incubacion. Cu yen di orguyo nos por bisa awe cu a persevera y ta tumando paso den e bon direccion. Awe 31 di october a tuma luga e formalisacion di un acuerdo por medio di un Letter of Intend (LOI) pa e introduccion di un “Business Incubation Island Aruba”. Esaki ta un documento caminda cu Gobierno di Aruba den representacion di Prome Minister di Aruba, sra. Evelyna Wever-Croes, Universidad di Aruba y KvK ta firma y asina mustra confiansa y colaboracion den e creacion di un plataforma pa incubadornan comercial na Aruba. E concepto ta pa haci Aruba un isla caminda iniciativanan ta wordo stimula den un ecosistema di incubacion den cua tur e stakeholders ta yuda e comerciantenan den e incubacion comercial pa crea un miho base economico pa e isla den su totalidad. Un di e metanan di un incubador comercial ta pa laga e negoshi crece y ta exitoso.

E idea ta pa crea un comunidad di incubacion comercial formalisa via e modelo Triple Helix. E colaboracion aki ta uno hopi significativo mirando e ta combina forsa y participacion di sector publico via Gobierno, sector priva via KvK y e sector di conocemento via Universidad di Aruba. E participantenan ta haci realidad e plataforma y lo establece un fundacion bou di e nomber di ABIA: Aruba Business Incubation Agency na unda lo asigna un directiva pa maneha e plataforma. Un di e aspectonan mas importante tras di esaki ta e colaboracion cu ta wordo crea y door di conecta tur e stakeholders ta haci posibel cu tur participante ta contribui na un solo meta y comparti actividad y conocemento tecnologico. E ecosistema ta brinda oportunidad pa comparti y baha cierto gastonan y ta stimula colaboracion via inovacion cerca e companianan.

E compromiso di ABIA pa nos comercio

E LOI ta duna forsa na e compromiso entre gobierno, Universidad di Aruba y KvK pa crea un isla di incubador comercial bou supervision di ABIA. E plataforma ABIA lo percura pa colaboracion pa promove inovacion social y economico. Door di establece y conecta e diferente localidadnan di incubador comercial na Aruba ABIA kier crea un miho ambiente pa negoshinan y start-ups caminda por colabora y asina desaroya Aruba den un isla di incubacion comercial. Otro aspecto importante ta cu e incubador lo yuda e negoshinan via coaching, facilita servicionan y ta a base di e metanan cu ta inclui den e SDGs (Sustainable Development Goals) pero tambe por enfoca  riba e sectornan prometedor manera Gobierno tin stipula. E posibilidad ta existi tambe cu companianan cu kier crece of expande nan servicionan of productonan por haya e sosten door di participa den un incubador.

Aporte financiero di Gobierno

Gobierno ta inverti tambe pa e formalisacion di ABIA pa yuda cubri parti di e gastonan di e prome aña. E compromiso aki sigur ta di aprecia y ta mustra cu Gobierno ta wak e importancia di incubadornan comercial na Aruba. Gobierno a apunta Aruba Futura Foundation pa fungi como respresentante di ABIA.

Esaki ta mustra e importancia  pa Aruba di transforma den un isla incubador di negoshi cu ta duna balor na e empresarionan pa por lanta un negoshi stabil y duradero. Colaboracion ta hopi importante pa e exito di un negoshi y esaki ta wordo formalisa por medio di e Aruba Business Incubation Agency.

Aruba, 31 di october 2019

Scroll To Top

Events

    Upcoming Events

    1. ATIA Annual Corporate Event 2019

      November 15 @ 7:00 pm - 11:00 pm
    2. Lecture KvK – Dutch Caribbean host country Emigration Expo 2020 – Netherlands

      November 18 @ 12:00 pm - 2:00 pm
    3. Latin American Congress of Ports (AAPA Latinoamerica)

      November 19 - November 21
    4. 19 Edition Expo Guajira 2019

      November 21 - November 23
    5. Handelsmissie en congres

      November 25 - November 30

    Make an appointment

Sitemap | Privacy Policy | Disclaimer | By orbitalnets