Kamer van Koophandel en Nijverheid Aruba | Chamber of Commerce and Industry Aruba

14-2020 – En conexion cu negociacion entre Aruba y Hulanda: KvK ta duna sosten na Premier pa yega na reforma cu ta beneficia Aruba

Oranjestad – Camara di Comercio y Industria (KvK) tin tur confiansa cu den dialogo cu Hulanda nos Ministro Presidente lo sa di tuma decisionnan den bienestar di nos comunidad y lo trata di yega na reformanan structural, economico, financiero, social y institucional cu e meta pa haci Aruba mas resistente y menos vulnerabel, sin pone nos autonomia den riesgo.

KvK ta sostene un procedemento integral y colectivo pa reinforsa e economia di Aruba den un forma duradero y pa aumenta e poder di compra di cada cuidadano pa por logra bienestar social.
Reforma ta necesario pa yega na un sociedad sostenibel teniendo prosperidad y bienestar den balansa. Pa logra esaki ta esencial pa Gobierno reduci su gastonan na un nivel aceptabel y pa optimalisa e calidad, accesibilidad y efectividad di e aparato gubernamental. E regimen fiscal mester ta transparente, solido y comprendibel y mester percura pa aumenta e porcentahe di cumplimento. Por lo tanto KvK ta popone pa introduci un sistema di impuesto indirecto, manera “sales-tax”.

Tambe ta necesario pa trece cambionan riba tereno economico. Actualisacion y flexibilisacion di e leynan laboral ta importante, como tambe mehoracion di e condicionnan y reduccion di e gastonan pa haci negoshi. Di e forma aki ta stimula crecemento economico y ta crea oportunidad pa Aruba su economia recupera. E bienestar di nos comunidad tambe ta rekeri atencion y ta sumamente importante pa por garantisa e calidad y eficiencia di e cuido medico y e seguridad en general di nos comunidad door di fortifica e sistema hudicial. Ademas, mester percura pa un miho coordinacion entre enseñansa y e mercado laboral.

KvK ta di opinion cu si Aruba ricibi conseho y/o ayudo for di Hulanda den preparacion y ehecucion di e proceso di reforma, esaki mester ta basa riba respet mutuo y e normanan di Bon Gobernacion. Pa por logra e meta, naturalmente tur e instancianan concerni mester sostene y duna aporte pa ehecuta e reformanan en cuestion. E autonomia di pais Aruba, incluyendo e entidadnan y departamentonan gubernamental mester wordo respeta na tur momento.

Aruba, 17 di juli 2020

Camara di Comercio y Industria (KvK)

Scroll To Top