04-20 – Evento pa tur socionan comercial di KvK: Durante New Year’s Celebration 2020 KvK a introduci directiva nobo
Oranjestad – Camara di Comercio y Industria Aruba (KvK) a organisa su tradicional “New Year’s Celebration”. Di e forma aki ta habri 2020 y KvK tin planea pa organiza hopi mas evento na bienestar di comercio di Aruba. Via e evento aki KvK ta duna e oportunidad na tur e socionan pa yama un bonbini na un aña nobo den compania di e miembronan di directiva di KvK. Un invitacion a wordo extendi den nomber di e directiva di KvK na diferente stakeholders y socionan comercial tanto den sector publico como sector priva pa nan ta presente.
E invitadonan por a disfruta di un ambiente hopi ameno y bon acompaña pa musica di steelband den auditorio y riba balcon di KvK. Asina por a encontra otro y elabora riba diferente desaroyonan y e bon intencionnan pa 2020. E vice-presidente di directiva, sr. Omar Tromp, a hiba palabra di bonbini na e invitadonan. Sr. Tromp a introduci e miembronan di directiva dunando un descripcion breve di nan expertisio y rol den e directiva. E directiva nobo tin conocemento riba diferente materia y ta traha den diferente sector. Di e forma aki por haci un bon representacion y aporte na desaroyonan economico y cu tin impacto riba comercio na Aruba. Siguientemente a bisa un danki na e team dinamico di KvK y a culmina dunando tur esnan presente e libertad di combersa cu otro y disfruta di e bon ambiente cu bebida y aperitivos.
Directiva nobo
E directiva nobo di KvK ta consisti di miembronan cu ta representa negoshinan cu ta forma parti di tanto grootbedrijf como kleinbedrijf. E directiva ta conta cu tres miembro nobo den persona di sra. Sandy Odor (grootbedrijf), sr. Gerardus (Geert) Weber (grootbedrijf), sr. Daniel Ferrara (kleinbedrijf). Sr. Omar Tromp (kleinbedrijf) a wordo reeligi como miembro di directiva. Otro miembronan cu a keda den directiva ta sra. Monica Kock, sr. Satish Daryanani, sr. August (Anthony) Croes, sra. Wanda Broeksema y sra. Alexlindy (Lindy) Croes. Presidente di e Directiva ta Sr. Daryanani y Vice-Presidente ta Sr. Tromp. E directiva di KvK tin e interes di e comerciante na pecho. A base di deseo y preocupacionnan di comercio e Directiva di KvK lo traha duro pa duna bon conseho na gobierno pa bienestar di henter nos comunidad.
Camara di Comercio y Industria Aruba ta desea henter pueblo di Aruba, en particular tur nos comerciantenan, un prospero 2020 yena di dicha y hopi exito.
Aruba, 23 di januari 2020
Camara di Comercio y Industria (KvK)
Events
Make an appointment
