Kamer van Koophandel en Nijverheid Aruba | Chamber of Commerce and Industry Aruba

52-2019 – Un directiva nobo combinando diferente specialidad: KvK ta anuncia miembronan nobo di Directiva di KvK

Oranjestad – Conforme cu stipulacion den ley pa cu participacion den directiva di Camara di Comercio y Industria Aruba (KvK) e periodo di algun miembro di directiva di KvK a finalisa. Di e forma aki ta crea espacio pa miembronan nobo cu ideanan fresco y por combina experiencia.

Representacion den directiva

E directiva di KvK ta consisti di miembronan cu ta representa negoshinan cu ta forma parti di tanto grootbedrijf como kleinbedrijf. E directiva ta conta cu tres miembro nobo den persona di sra. Sandy Odor (grootbedrijf), sr. Gerardus (Geert) Weber (grootbedrijf), sr. Daniel Ferrara (kleinbedrijf). Sr. Omar Tromp (kleinbedrijf) a wordo reeligi como miembro di directiva. Otro miembronan cu a keda den directiva ta sra. Monica Kock, sr. Satish Daryanani, sr. August (Anthony) Croes, sra. Wanda Broeksema y sra. Alexlindy (Lindy) Croes. E miembronan cu ta retira di e directiva ta sr. Randall Croes, sr. Lionel de Cuba, y sr. Kawish Misier. Durante e prome reunion cu lo tuma luga na comienso di 2020 lo eligi e presidente, vice-presidente y lo apunta e presidente suplente di directiva pa aña 2020.

Un team dinamico

E directiva nobo di KvK ta uno hopi diversifica y esaki sigur ta trece beneficio como representante di e comunidad comercial. E directiva ta consisti di miembronan nobo pero tambe miembronan cu tin experiencia y esaki sigur ta beneficioso pa por enfrenta e retonan existente y duna nan e debido atencion. E board tin empresarionan cu tin Aruba y comercio local na pecho y cu den nomber di sector priva ta traha duro pa mantene bon comunicacion cu sector publico. E trabou di un miembro di directiva ta boluntario, basa riba e deseo y forsa propio pa traha na bienestar di comunidad di Aruba. E  miembro di directiva ta duna extra di su tempo banda di su propio negoshi pa yuda hiba Aruba completo dilanti.

Directiva di KvK ta cla y dispuesto pa yuda tur cliente y tin oido pa tur sector comercial. KvK tin como prioridad pa sigui traha riba su metanan y continua e trabounan pa representa comercio. E directiva ta traha duro y lo keda conseha gobierno di Aruba riba topiconan cu ta di importancia pa comercio di Aruba por sigui crece. Di e forma aki tambe comparti nan experiencia y sigui stimula ideanan innovativo.

Aruba, 20 december 2019

Camara di Comercio y Industria (KvK)

Scroll To Top