35-2018 – Pa stimula e colaboracion comercial di e empresario femenino: FEMCITY HUNTO CU KVK A ORGANISA UN TREMENDO EVENTO YENA CU INSPIRACION
Oranjestad – Diabierna 5 di october a tuma luga e evento titula “Women and the art of collaboration” organisa den colaboracion entre FEMcity y Camara di Comercio y Industria di Aruba (KvK). E evento a enfoca riba e empresario femenino caminda cu diferente presentacion a wordo duna y tambe a brinda oportunidad pa haci pregunta na e invitadonan di Merca y otro panelistanan. FEMcity ta un organisacion cu miembrecia global pa hende muhe den mundo comercial. FEMcity ta un comunidad cu tin alrededor di 20 mil miembro rond mundo cu ta duna otro apoyo y inspira mas posibilidadnan comercial. Pa mas detayes por bishita nan website www.femcity.com
Despues di registra, esnan presente por a disfruta di un desayuno prome cu e programa cuminsa. Sra. Julisa Arends-Hoevertsz a fungi como e maestro di ceremonia pa e evento. Cu un sala completamente yen, Sra. Sonja Velthuizen, Directora di KvK a dirigi algun palabra di bonbini na tur e invitadonan. Sra. Velthuizen a elabora riba e meta di e evento “Women and the art of collaboration”. Siguientemente e presidente di FEMcity, Sra. Cheyenne Dominguez a duna un introduccion over di FEMcity, nan iniciativa y kico nan kier logra pa e empresario femenino. Despues a continua cu un presentacion di Sra. Susan Ruiter di Aruba Experience Café cu a conta tocante su exito como un empresario femenino local.
E siguiente empresario riba agenda tabata Sra. Violette de Ayala kende ta fundado y CEO di FEMcity. Sra. De Ayala a elabora riba con bo por crea e bida cu abo ta desea. Despues di su presentacion a yama dilanti e invitadonan di FEMcity pa un sesion cu nan como panelistanan caminda cu e moderador Sra. Cheyenne Dominguez y tambe e publico presente por a haci algun pregunta. Por ultimo Sra. Cheyenne Dominguez a tuma e escenario un biaha mas pa su presentacion riba con pa haci un impacto remarcabel.
A clausura e mainta cu e oportunidad di networking y tur esnan presente por a traha riba nan lasonan comercial y discuti cu otro invitadonan presente riba e diferente topiconan cu a wordo presenta durante e evento “Women and the art of collaboration.”
KvK kier gradici FEMcity pa nan colaboracion y ta mira pa un futuro evento dedica na motiva y stimula e empresario femenino. Un danki ta bay tambe pa Carmen Steffens y Sra. Candy Rasmijn-Reino di Connect PR & Marketing pa nan aporte na e evento aki.
Aruba, 8 october 2018
Camara di Comercio y Industria (KvK)
Events
Make an appointment
