Kamer van Koophandel en Nijverheid Aruba | Chamber of Commerce and Industry Aruba

019-24- RESUMEN DI AÑA 2024

Oranjestad – Den e resumen aki, Camara di Comercio y Industria (KvK) kier trece dilanti un resumen di actividadnan comercial cu KvK a organisa durante 2024, e encuestanan cu a wordo lanza, resumen di e cambionan cu a tuma lugar den 2024, y tambe duna un indicacion di e desaroyo di comercio na Aruba basa riba registracionnan di negoshi na KvK.

Acitividadnan di KvK
Un di e metanan principal di KvK ta pa yuda stimula comercio, y organisa eventonan ta forma parti di esaki. Durante 2024 KvK a organisa varios sesion cu a cubri un variedad di tema. Alabes, a eligi na januari sr. Diederik Kemmerling como presidente y sr. Robert Croes como vice-presidente di e Directiva. E directiva a enfoca riba forsa colaboracion entre gobierno y sector priva y a traha riba e deseonan di comercio local​​.

KvK a organisa varios actividad pa nos empresarionan durante e aña aki.

• Na januari a organisa un networking event unda cu invitadonan, tanto di sector priva como tambe di sector publico, por a disfruta di un anochi placentero y cera conoci cu e Directiva di KvK pa 2024.
• Na mei a organisa un mision entrante di Trinidad & Tobago. KvK a ricibi un delegacion di 18 companianan di Trinidad & Tobago conhuntamente cu e Trinidad & Tobago Chamber of Industry and Commerce y e Trinidad and Tobago Manufacturers’ Asociation pa explora e mercado y oportunidadnan di negoshi na Aruba. Durante e reunionnan di matchmaking, comerciantenan di ambos pais a conoce otro di cerca y explora posibilidadnan di colaboracion. E participantenan a keda hopi satisfecho cu e mision aki.
• Na juni, un bes mas, riba iniciativa di Minister di Economia, Comunicacion y Desaroyo Sostenibel, den colaboracion cu Departamento di Asunto Economico, Comercio y Industria (DEZHI) y Aruba Trade & Industry Association (ATIA), a organisa un mision comercial pa Surinam. E mision a consisti di un delegacion comercial caminda 15 comerciante, representando 13 compania di Aruba, a bishita Paramaribo, cu e fin pa conoce y crea oportunidadnan di negoshi cu empresarionan di Surinam. Un cantidad grandi di empresarionan di Surinam a reuni durante matchmaking cu e delegacion comercial di Aruba. E delegacion comercial tabatin casi 100 cita cu comerciantenan di Surinam y a keda hopi satisfecho cu e citanan ricibi.
• Business Plaza a tuma luga na juli. Ya pa mas di 10 aña KvK ta organisando esaki.
• Den luna di oktober, KvK a organisa su gran evento anual ‘Aruba Chamber Business Island Event’ riba e prestigioso Renaissance Island. Pa e edicion aki e topico tabata ‘Navigating the future of work’. E aña aki a conta cu 2 orador, un internacional y un local. Durante e evento aki tur presente a haya hopi informacion valido con pa adapta nan negoshi na e mundo di trabou cu ta cambiando.
• Na november a tuma luga un debate electoral, cu a wordo organisa door di KvK conhuntamente cu Universidad di Aruba, Setar y TeleAruba, caminda 10 lider politico a participa. E debate a sirbi como un plataforma obhetivo pa tene discusionnan cu contenido riba un nivel halto, y trata un variedad di temanan cu ta di gran importancia pa nos comunidad. Riba plataforma digital e debate a surpasa 35 mil views, y e hecho cu miles di persona a sintonisa via Tele Aruba, ta mustra cu e debate a conta cu un acohida grandi.
• Durante lunanan di juli te cu november a tuma luga OSTAD200 INCUBATOR, un proyecto diseña pa Impact HUB Aruba, den colaboracion cu KvK y cu e aporte di Minister di Economia, Comunicacion y Desaroyo Sostenibel. E meta di e proyecto tabata pa yuda entrepreneurs y comerciantenan logra desaroyo sostenibel pa medio di e.o. diferente traning y coaching. Na final tur participante a presenta un pitch y e ganadonan a ricibi un fondo.
• Manera ta custumber tur aña a organisa e curso FAB (‘Financiële Administratie voor beginners’).

KvK por wak bek na dos mision comercial exitoso cu a tuma luga e aña aki.Ta e intencion pa otro aña KvK continua cu e eventonan, sesionnan y misionnan comercial pa asina duna atencion na diferente topiconan interesante y duna informacion practico na nos comerciantenan, alabes yudando nos comerciantenan crea mas lasonan comercial cu companianan den exterior.

 Encuestanan durante 2024
Cu e meta di haya un miho bista riba e scarsedad di trahado, e tipo di trabou cu ta wordo ofreci y cual sectornan economico ta wordo afecta particularmente, KvK a tene un encuesta bou di nos sector comercial durante 2024. Den e prome encuesta aki, mayoria di compania na Aruba ta pensa cu e scarsedad di trahado lo empeora. Alabes, tres-cuater parti di empresanan cu a participa den e encuesta a indica cu nan tabatin dificultad pa haya personal cualifica pa yena cupo di trabou. Mayoria di e companianan ta buscando entre 2 y 5 trahado y 20 porciento ta buscando hasta mas cu 10 empleado. Dos-tercer parti di e empresanan ta cualifica e intensidad di e escasez como “intenso”, ademas 22.5% ta cualifica e escasez manera “modera”.

Alabes, mas cu mita di e empresanan ta kere cu e scarsedad di trahado lo empeora den e proximo 1 pa 2 aña, y solamente 8 porciento di nan ta pensa cu e situashon lo mehora. Companianan ta buscando un variacion grandi di trahado, manera pa haci limpiesa, room attendant, hende pa mantencion, hardinero coki, accountant, HR manager, ingeniero, arkitecto, operador di machine, etc. Pa mas informacion tocante e resultadonan por bishita nos website: https://arubachamber.com/pages/results-labor-shortage-survey/.

Den e di dos encuesta pa 2024, KvK den colaboracion cu UNESCO Aruba, a presenta un encuesta relaciona cu e familiaridad y implementacion di Inteligencia Artificial (AI) den e sector comercial na Aruba. E meta di e encuesta aki tawata pa haña un bista riba e conocemento y uzo responsabel di AI den sector comercial pa fungi como base pa monitoria e desaroyonan riba e tereno di transformacion digital y AI den un contexto mas amplio. E encuesta aki a mustra cu mientras cu e sector comercial di Aruba ta reconoce e potencial transformativo di AI, su adaptacion ta limita pa motibo di falta di conocemento, resistencia interno, y preocupacionnan etico. Pa por probecha mas di e beneficionan di AI, ta necesario pa duna prioridad na educacion, fortifica capacidadnan y palabra con ta coopera pa hunto traha riba e desafionan.

Pa mas informacion tocante e resultadonan por bishita nos website: https://arubachamber.com/pages/017-24-kvk-y-unesco-ta-presenta-resumen-encuesta-di-inteligencia-artificial/ai-survey-infographics-final/.

 Actualmente KvK a caba di saca e di 3 encuesta pa e aña aki cu e meta pa inventarisa e retonan cu comerciantenan ta enfrenta den nan negoshi. KvK lo presenta e datonan aki y dialoga cu Gobierno riba e retonan treci dilanti den e encuesta. Por haya e link pa e encuesta riba nos pagina di facebook: https://www.facebook.com/arubachamber. KvK ta pidi tur comerciante pa yena e encuesta aki.

 Aporte y sosten
Siendo e organisacion y cuerpo representativo di comercio na Aruba, KvK continuamente ta percura pa fortalece laso cu sector comercial, brindando e apoyo necesario tanto na startups como tambe na negoshinan existente. Pa logra esaki ta sumamente importante pa traha conhuntamente cu partners relevante y mantene e contacto y bon relacion. Durante 2024, KvK a asisti na diferente reunionnan cu Gobierno. Ademas, KvK ta den combersacionnan continuamente cu Minister di Economia, Comunicacion y Desaroyo Sostenibel riba topiconan concerniente.

Registracion y cancelacion
Durante e aña aki a registra un total di 1380 empresa nobo. Nos a observa menos registracion nobo cu aña pasa, pues na 2023 tabatin 1619 registracion nobo. Den totalidad tabatin 565 negoshi cu a wordo cancela of likida e aña aki, mientras cu aña pasa esey tawata 783 negoshi. Si haci un comparacion cu añanan anterior nos por observa lo siguiente:

 Tabel 1: Cambionan den nos sector comercial

Nos por observa cu e cantidad total di compania a subi di 19,750 na 2023 pa 20,466 na 2024, un aumento di 716 compania. E tasa di crecemento a baha pa 3.6% na 2024, compara cu 4.3% na 2023. Esaki ta indica un ritmo mas slow di crecemento den cantidad total di companianan.

Den e cantidad di registracion di negoshi nobo pa e ultimo añanan tin fluctuacion significante, pero por nota tur aña un crecemento compara cu e aña anterior, cu un piek na 2021 (25.7%) y un otro crecemento notabel na 2023 (12.8%).  Sinembargo, e registracion di negoshi nobo a baha di 1619 na 2023 pa 1380 na 2024, un  reduccion significante di 239 compania.

E porcentahe di cancelacion y likidacion ta fluctua entre e periodo di 2018 te cu 2024. Sinembargo por nota cu cancelacion y likidacion ta birando menos durante e periodo aki. E balornan negativo aki ta indica un reduccion den cancelacion y likidacion, cual ta sugeri cu menos negoshi ta sera nan porta. Ademas, cancelacion y likidacion di negoshinan a baha di 783 na 2023 pa 565 na 2024. Esaki ta reflecta un reduccion di 27.8% cual ta indica cu 2024 tabata e aña cu menos negoshi a sera den e ultimo 7 añanan.

Cambionan importante den 2024
Entrante 27 di maart 2024, KvK a cuminsa cobra un tarifa pa consulta informacion detaya di companianan den e Registro Comercial online riba e website di KvK.  KvK a hasi inversionnan significante pa digitalisa e Registro Comercial, cu e meta pa facilita e acceso na e Registro Comercial den un forma digital cu ta accesibel pa tur persona for di e comodidad di nan cas of oficina. Sinembargo, KvK no a aumenta e tarifanan di su productonan desde aña 2009 a pesar di e costonan halto di e proceso y di mantencion di e database. Pa es motibo a introduci un tarifa minimo pa consulta informacion detaya di companianan den e Registro Comercial online. Alabes, KvK a agrega un capa extra di seguridad cu e introduccion di e Multifactor Authentication (MFA) pa tur usuarionan di MyChamber, cu e meta pa mehora e seguridad di e database di Kvk y proteha informacionnan sensitivo. Por ultimo, e ultimo dia pa registra UBO di un organisacion, fundacion of asociacion tabata 1 di juli 2024. Si no a registra e UBO ainda, e director of doño por haya un boet. KvK kier recorda tur entidad huridico cu tin e obligacion di registra nan UBO(nan) pa haci esaki mas pronto posibel. KvK tawata ocupa cu varios tarea pa asina cumpli cu esakinan den un manera structura.

 Gradicimento
KvK ta gradici tur stakeholders y ta spera riba un otro aña productivo cu e cooperacion di semper di su stakeholders pa sigui brinda bon servicio y apoyo na su clientenan. Alabes, Directiva y Personal di KvK ta desea henter e pueblo di Aruba, especialmente nos comunidad empresarial, un bon y felis clausura y cambio di aña!

Aruba, 23 di december 2024
Camara di Comercio y Industria (KvK)

Scroll To Top