10-2019 – Creando mas oportunidad comercial pa Aruba
KvK ta yuda organisa mision comercial entre Puerto Rico y Aruba
Oranjestad – Di 20 pa 22 di februari ultimo Camara di Comercio y Industria di Aruba (KvK) den colaboracion cu gobierno di Puerto Rico via di e organisacion Puerto Rico Emprende a organisa un evento di mision comercial. E mision comercial ta consisti di negoshinan di Puerto Rico cu ta bishitando nos isla cu e fin di crea mas negoshi atraves di e oportunidadnan cu Aruba ta ofrece. Pa 3 dia un grupo di comerciante cu ta representando 10 compania hopi diversifica di Puerto Rico a bishita nos isla pa conoce nos sectornan comercial. Nan meta principal ta pa cera acuerdonan comercial entre e negoshinan di Puerto Rico y di Aruba.
Informacion encuanto negoshi na Aruba
E prome dia tabata un dia di orientacion caminda a brinda diferente informacion encuanto negoshi na Aruba. Despues di un palabra di bon bini y splicacion breve di e presidente di directiva di KvK sr. Kawish Misier, a continua cu e presentacionnan di e diferente instancianan local cu ta yuda na crea oportunidadnan comercial na Aruba. E comerciantenan di Puerto Rico a haya presentacion di DEZHI presenta door di sra. Zulema Dabian kende a trece dilanti cifras actual di economia di Aruba relaciona cu Puerto Rico y a conta riba e servicio di DEZHI. Sra. Corry Caster di Freezone Aruba a elabora riba e oportunidadnan cu Freezone Aruba tin pa ofrece. Sra. Diana Clarke di Arina a conta encuanto oportunidadnan na Aruba y con Arina por yuda inversionista di afo pa establece un negoshi na Aruba y sr. Rafeli Croes di KvK a duna un presentacion riba e rol di KvK y con KvK ta yuda tur tipo di comerciante y kico tin cu tene na cuenta ora di lanta un negoshi na Aruba. E bishitantenan tabata hopi interesa den tur e informacion cu nan a ricibi y a haci algun pregunta a base di nan interes pa haci negoshi na Aruba.
Conoce otro via matchmaking
Durante e siguiente dia di e evento nos comerciantenan por a haya mas informacion di e producto y servicionan cu e negoshinan di Puerto Rico ta brinda. Esaki por medio di e matchmaking cu KvK a organisa. KvK a tene un matchmaking den su auditorio caminda cu a combina diferente negoshi local cu negoshi di Puerto Rico a base di nan potencial y similaridad. Diferente di e negoshinan di Puerto Rico a bin cu muestra di nan producto y asina a elabora riba loke nan ta produci. Durante e matchmaking a brinda e oportunidad pa intercambia idea y traha riba sinergia pa asina crea mas relacion comercial. Hopi di e negoshinan presente a bin Aruba pa busca distribuidor, representante, wholesalers of cera partnerships pa traha hunto cu empresarionan local riba proyectonan comercial
E bishitantenan di Puerto Rico a keda hopi entusiasma di mira kico tur Aruba ta ofrece y a intercambia hopi informacion cu nos comerciantenan local. KvK ta hopi satisfecho mirando e interes di ambos banda pa haci negoshi. Asina KvK por wak bek na 2 mision comercial cu a tuma luga na Aruba den corto tempo. Prome uno cu Panama y awo cu Puerto Rico. KvK tin mas mision comercial den pipeline y ta comunica esaki cu e comunidad comercial pa nan ta na altura di e oportunidadnan cu ta presenta. Si bo ta desea mas informacion encuanto mision comercial cu a tuma luga of cu ta riba agenda, por tuma contacto via businessinfo@arubachamber.com of yama na 582-1566 ext. 27/35/42/30.
Aruba, 25 di februari 2019
Camara di Comercio y Industria (KvK)
Events
Make an appointment
