02-2024 – KVK A TENE SU KICK OFF MIXER Y MEET THE BOARD 2024
Oranjestad – Camara di Comercio y Industria Aruba (KvK) a organisa su prome evento pa aña 2024 riba diamars, 23 di januari ultimo. Manera ta custumber, na comienso di aña, KvK ta organisa un evento caminda invitadonan, tanto di sector priva como tambe di sector publico, ta bini hunto pa socialisa y na mesun momento por cera conoci cu e directiva nobo di KvK. KvK ta haya importante pa socialisa y mantene contacto cu stakeholders di sector priva y tambe sector publico y alabes probecha e momento pa gradici un y tur pa e bon comunicacion y cooperacion ricibi durante e aña cu ta tras di lomba.
E Presidente saliente, sr. Gavril Mansur, a gradici tur stakeholders pa e cooperacion cu KvK a ricibi durante 2023. Alabes, sr. Mansur a comenta di ta hopi entusiasma pa e aña aki na unda KvK tin un Presidente cu hopi energia y animo pa traha pa comercio. Alabes, e la expresa di ta duna su sosten completo na e Presidente nobo.
E Presidente nobo pa aña 2024, sr. Diederik Kemmerling, a comparti algun palabra cu e publico, y comparti su vision y punto di bista di con e lo percura pa hiba maneho durante su temporada como Presidente hunto cu e demas miembronan di directiva. Por ultimo, sr. Kemmerling a vocifera cu KvK lo keda mantene e comunicacion estrecho cu e stakeholders y cu Gobierno di Aruba, y ta desea di duna mas asistencia y guia na e comerciantenan den 2024. Den e cuadro aki, KvK lo evalua unda por duna mas asistencia den e retonan cu comerciantenan ta confrontando, y alabes ofrece mas variedad den trainingnan pa e doñonan di negoshi.
E aña aki tambe KvK lo ta ocupa cu varios tarea pa asina cumpli den un manera structura cu e cambionan den ley cu a tuma luga. Manera ya ta conoci, desde 1 di januari 2023, a introduci e ley nobo pa registra e UBO (Ultimate Beneficial Owner) di companianan. E ultimo dia cu por registra e UBO di companianan, ya existente prome cu e cambio di ley aki a tuma luga, ta 1 di juli 2024. Alabes, KvK lo cuminsa cu e disolucion di tur AVV’s (Aruba Vrijgestelde Vennootshap’) cu ta inactivo. Esakinan ta algun di e tareanan cu KvK ta ocupa cune actualmente, hunto cu otro proyectonan plania.
KvK ta contento cu e Kick Off Mixer y Meet the Board 2024 tabata un exito y ta gradici tur su invitadonan pa nan presencia, y ta spera cu e aña aki KvK lo por organisa mas evento, reunionnan, training y charla pa comercio pa asina por ta mas cerca di e comerciantenan pa por haya nan feedback y asina tin un bista mas amplio di e retonan, preocupacionnan y deseonan cu ta reina den sector priva.
Aruba, 24 di januari 2024
Camara di Comercio y Industria (KvK)
Scroll To Top
Events
Make an appointment
