14-22- Conoce e 4 oradornan di e Annual Business Event di KvK – ARUBA CHAMBER BUSINESS EVENT 2022 – 24 DI SEPTEMBER 2022
ORANJESTAD – Diasabra 24 di september lo tene den Renaissance Convention Center e Aruba Chamber Business Event 2022. Esaki ta e evento anual di Camara di Comercio y Industria Aruba (KvK) enfocando riba e empresario local y poniendo enfasis riba un topico actual. Pa e ocasion aki e topico ta dirigi riba “con pa construi un negocio resiliente pa e futuro” caminda e importancia di un empresa resiliente lo wordo discuti y e manera con empresario por fortica nan empresa. E topico aki ta hopi discuti tanto den sector priva como sector publico y KvK su meta ta pa conecta e comerciante y trece mas concientisacion durante e evento aki.
Durante e Business Event 2022 lo tin elaboracion tocante diferente temanan y tendencia cu ta relevante pa e situacion economico actual y pa nos futuro cercano. Entre otro lo elabora tocante e manera pa crea y mantene un team motiva, con pa haci uzo di inspiracion di “peers” y con pa implementa strategia y innovacion nobo den bo compania.
Jacob Brown
Pa e edicion aki KvK ta sumamente orguyoso di por a convence Sr. Jacob Brown for di Merca como invitado internacional pa bin duna un presentacion. Señor Jacob Brown ta un ex atleta di NFL cu a bira entrepreneur, lider y orador motivacional, cu a logra di inspira hopi hende con pa converti un fracaso den algo positivo. Actualmente e ta Vice-Presidente Executivo di Element5 Digital, un agencia den digital branding y marketing, e ta co-founder di Varlo, un marca di paña pa ciclismo y triathlon. Jacob ta conoci principalmente pa su personalidad riba LinkedIn, na unda e la logra di haya hopi followers, danki na su motivational posts, coaching y video cu ta inspira hende na #FailForward.
Martin de Boer
Kick Starter y entrepreneur, Martin de Boer sa con pa maneha diferente projectonan compleho y sa con pa converti e complexidad den exito total. E tin un conocemento amplio den area di digital marketing, cu experiencia amplio como Director Comercial na Corendon Curacao, y tambe como Sales Director na EuroParcs. Martin lo inspira su publico cu su storia exitoso tocante e cambio drastico cu Corendon Curacao mester a haci pa sobrevivi e crisis di Covid. Publico lo bai haya un vision amplio y internacional tocante marketing.
Henry van den Berg
Cu mas cu 20 aña di experiencia den e industria di servicio financiero, Henry van den Berg ta un experto den desaroyo empresarial, finanzas, pensioen y inversion. Despues di traha den investment banking, benta (sales) y actividad di pensioen di bida, Henry a bai traha na ENNIA, na 2015 como Director General di e oficina na Aruba, y Henry a contribui rapidamente na e aumento di e rentabilidad di ENNIA. Durante e ultimo siete añanan, Henry a dirigi e team di ENNIA y transforma ENNIA Aruba den un di e companianan liderazgo den area di seguro. Durante e evento, Henry lo comparti su conocimiento y experiencia den e area di desaroyo comercial y lo brinda un perspectiva (bista) nobo con pa wak bo mesun organisacion y e innovacion cu bo kier implementa.
Romilde van Commenée
Romilde ta un experto den e area di liderazgo (leadership) y e dinamico di dirigi ekipo (team). Despues di lidera hopi aña diferente ekipo y guia procesonan di cambio e la lanta su mesun compania na 2012. For di e momento ey Romilde a dicidi di siña entrepreneurs con pa dirigi nan ekipo den un manera exidesartoso. E ta autor di “Happy Leader”, un buki cu ta siñabo con pa dirigi bo ekipo, cu e meta di keda den control, crea paz y mantene un overview.
KvK ta desea di brinda nos Business Community un storia realistico cu ta inspira, duna oportunidad di adkeri conocimento y experiencia tocante e configuracion y structura di organisacionnan, y ademas duna un bista di e manera di stimula y motiva un ekipo y con pa incorpora y probecha di innovacion continuo. Despues di e presentacionnan ta sigui cu e parti social caminda por discuti riba e topico di e dia y crea of reforsa e lasonan comercial den un ambiente ameno.
Camara di Comercio y Industria ta yama danki na e patrocinadonan pa e evento cu ta ENNIA, Caribbean Mercantile Bank N.V., Grow Marketing Solutions N.V. (The Lab),
Hunter Security Company Vba y Qredits Aruba. Comunidad empresarial y pueblo di Aruba ta keda cordialmente invita pa asisti na e evento special aki. Tickets pa e Aruba Chamber Business Event 2022 ta disponibel online via Eventbrite y na oficina di KvK.
Pa mas informacion encuanto e evento por tuma contacto cu e departamento di BIS na telefon 582-1566 ext. 35/30 of via e-mail: businessinfo@arubachamber.com.
Aruba, 2 di september 2022
Camara di Comercio y Industria (KvK)
Scroll To Top
Events
Make an appointment
