Kamer van Koophandel en Nijverheid Aruba | Chamber of Commerce and Industry Aruba

27-2019 – Registracion y cambio di datos di negoshi posibel solamente digital: KvK ta informa cu pronto ta vence e fecha pa procesa informacion di negoshi via formulario

Oranjestad – Camara di Comercio y Industria (KvK) a bay over na un sistema completamente digital pa tur asunto di registracion di negoshinan. E sistema nobo ta pa facilita e servicionan pa e cliente y brinda oportunidad na e cliente di maneha su propio datos den un forma mas flexibel. Tur esaki via su propio account di My Chamber. E portal aki pa e cliente ta accesibel via www.arubachamber.com.

Papel ta pasa pa pasado

Desde cuminsamento tur informacion cu un persona mester duna pa registra su entidad legal ta bay riba un formulario di papel. Cu e sistema nobo KvK kier elimina esaki por completo. E sistema nobo ta elimina e uzo di formulario riba papel y ta reemplasa esaki cu yena e informacion via ‘My Chamber’. KvK a duna e oportunidad pa esnan cu ainda tin formulario algun tempo pa completa y entrega esaki. Pero e periodo di gracia pa entrega papelnan di formulario lo termina riba diabierna 28 juni 2019. Tene na cuenta cu despues di e fecha aki KvK no ta tuma ningun formulario riba papel mas y tur registracion of cambio di datonan di registracion ta bay over completamente via e sistema di registro nobo.

Crea bo account

Pa por haci uzo di e servicionan via e portal ‘My Chamber’ e ta importante pa crea bo account. Pa crea bo account bo mester tin un e-mail adres valido y activo. Riba website www.arubachamber.com bo ta haya e link ‘My Chamber’. Via esaki bo ta yega riba e portal unda bo mester crea bo account. Unabes bo a crea bo account bo tin acceso na informacion di registro via e portal. Via e portal bo por regla tur asunto di bo negoshi, cumpra extracto y mucho mas. Via e portal mes por haci pago pa diferente servicio di KvK tambe y di e forma aki ricibi productonan digital.

Via su My Chamber account e cliente ta haci su pedido y ta ricibi su extracto. Via e portal My Chamber e cliente por download y print e documento su mes si ta necesario. E extracto nobo ta bin cu un QR code cu ta indica su validez. Pa verifica e extracto mester subi riba website di KvK y bay riba “Validate extract”. Si ta riba smartphone of tablet, por scan e QR code, of copia e link pa valida y si ta tras di un computer por yena e codigo manera e ta mustra riba e documento. Di e forma aki por controla si e extracto ta uno valido. Ta importante pa indica cu e documento aki tin un validez di un luna. Si acaso un cliente kier toch haya un extracto riba papel, por pidi y cumpra esaki na balie di KvK. Tambe KvK por scan documentonan di e cliente cu mester wordo uploaded den registro. Tene cuenta si cu tin gasto mara na e servicionan aki di print y scan.

Pa mas informacion y si tin cualkier pregunta of mester ayudo cu bo account, manda un e-mail na support@arubachamber.com splicando bo situacion. KvK ta aprecia tur feedback como cu esaki ta contribui na mehora e calidad di servicio.

Aruba, 13 juni 2019

Camara di Comercio y Industria (KvK)

Scroll To Top