06-22 – KVK A REUNI CU VNO: Relacion cu Hulanda ta duradero
Oranjestad – Camara di Comercio y Industria Aruba (KvK) tabatin e placer pa reuni cu representante di Hulanda na Aruba (VNO), señor David Abrahams.
Durante e encuentro aki KvK tabatin e oportunidad pa delibera abiertamente riba e preocupacionnan di comercio y nos comunidad en general. Tambe a papia di e situacion financiero di Aruba y e pasonan cu mester wordo tuma pa Aruba por paga bek e sosten financiero ricibi di Hulanda. KvK ta gradicido cu Hulanda a aporta pa Aruba y comercio.
Alabes a amplia riba e Landspakket y e estudionan andando. A pone enfasis riba e importancia pa tin un bon comunicacion y colaboracion entre stakeholders, Gobierno di Aruba y Hulanda, particularmente tocante e investigacionnan andando y e rapportnan. KvK a participa den varios di e investigacionnan aki y ta en espera di e resultadonan. Un otro tema cu a bin dilanti ta concerni e gastonan di Gobierno. Mester evita cu e diferente reformanan y restructuracionnan cu lo genera mas entrada pa Gobierno wordo destina pa aumenta su gastonan. Un condicion primordial di KvK ta cu reforma fiscal mester wordo compaña cu reduccion di e gastonan di Gobierno, incluyendo e gastonan di salario.
Otro puntonan cu a wordo treci dilanti ta e introduccion di e sistema di BTW entrante 1 di januari 2023, e situacion social di Aruba, nos systema di educacion y e necesidad pa motiva y crea oportunidad pa Arubianonan cu a studia den exterior bin traha na Aruba.
VNO y KvK ta desea cooperacion estrecho pa asina por intercambia informacion y conhuntamente por atende e preocupacionnan y puntonan di atencion comun y duna aporte na bienestar di Aruba en general y comercio.
Aruba, 28 februari 2022
Camara di Comercio y Industria (KvK)
Scroll To TopEvents
Make an appointment
