Kamer van Koophandel en Nijverheid Aruba | Chamber of Commerce and Industry Aruba

10-2021 – KvK a reuni cu Fitch encuanto desaroyo financiero, economico y di vacuna

Oranjestad – Camara di Comercio y Industria Aruba (KvK) a reuni cu e compania di rating Fitch pa delibera riba desaroyo financiero, economico y e maneho cu ta wordo hiba pa combati Covid-19. E ultimo evaluacion di Fitch a tuma luga na april 2020, un luna despues Aruba a cera su frontera debi na Covid-19. E downgrading cu Fitch a impone aña pasa, tabata pa motibo cu Fitch a anticipa un caida economico fuerte pa Aruba debi na e perdida di e entrada di turismo pa 2020/2021 y e deterioracion severo den e cuentanan fiscal y entrada internacional como consecuencia di e crisis di Covid-19.

Actualmente e compania Fitch ta evaluando – fuera di e situacion economico – con exitoso Aruba ta den su lucha contra e pandemia. Asuntonan relevante pa evalua esaki ta, por ehemplo, si e medidanan cu a wordo tuma tabata exitoso pa yuda e comunidad empresarial. Otro puntonan ta e maneho hiba pa garantisa empleo, yudansa financiero pa esnan desemplea, e maneho monetario y fiansanan necesario, maneho pa atrae turismo y e implementacion di e plan pa vacuna mas tanto hende posibel.

Un di e puntonan cardinal ta e hecho cu Aruba a yega na un acuerdo cu Hulanda pa haya yudansa financiero den forma di fiansa cu ta condiciona na reformanan structural, incorpora den e Landspakket. E yudansa cu Gobierno ta duna por medio di FASE, e sosten financiero na empresanan chikito y mediano cada kwartaal y e subisidio di salario cu ta continua pa e resto di aña 2021, ta wordo considera esencial pa por stabilisa e situacion financiero y economico. E hecho cu Aruba ta vacunando ta esencial pa un recuperacion economico, cu Fitch tambe ta considera den su evaluacion.

KvK a combersa cu Fitch tambe tocante puntonan importante pa fortalece nos economia. Temanan cu a wordo discuti tabata entro otro e reformanan fiscal, e necesidad pa hisa e nivel di cumplimento di impuesto, introduci maneho pa yega na un “level playing field”, diversificacion di nos economia, mehora condicionnan empresarial y e necesidad di baha e payroll di gobierno. KvK a enfatisa cu ta hopi urgente pa gobierno tuma pasonan necesario pa haci nos economia mas competitivo y resiliente.

KvK ta agradecido pa e oportunidad cu Fitch a duna pa por dialoga, y KvK ta confia cu e dialogo ta contribui na un evaluacion balansa y honesto.

Aruba, 30 di maart 2021

Camara di Comercio y Industria (KvK)

Scroll To Top