Kamer van Koophandel en Nijverheid Aruba | Chamber of Commerce and Industry Aruba

04-2021 – Durante reunion a elabora riba diferente topiconan cu ta impacta comercio: KvK ta comunica cu e programa manager, sr. Kruk

Oranjestad – Riba diaranson, 13 di januari ultimo, Camara di Comercio y Industria (KvK) a tene un reunion cu sr. Anton van der Kruk, programa manager Aruba di Ministerio di “Binnenlandse Zaken en Koninkrijksrelaties”, cu ta forma parti di e grupo encarga pa haci trabou preparatorio pa e “Caribisch Hervormings- en Ontwikkelingsorgaan” (COHO).

KvK a pidi e reunion aki pa stimula comunicacion y colaboracion entre sector priva y sector publico relaciona cu e Landspakket Aruba. Temanan cu ta wordo trata den e Landspakket ta entre otro: reformacion di sector publico, establecemento di finansa stabiel y duradero, reformacion economico, cuido medico, modernisacion di enseñansa y fortificacion di nos sistema hudicial.

Durante e reunion cu sr. Kruk a toca e tema di reforma fiscal. E meta principal ta pa simplifica e regimen fiscal, creando un regimen fiscal sostenibel. KvK, como representante di comercio, ta di opinion cu ta prudente pa implementa un impuesto indirecto, manera un “salestax”, cu lo reemplasa e otro formanan di impuesto y asina facilita e control y cumplimento y crea un “level playing field” pa tur comerciante eliminando e burocracia mas tanto cu ta posibel.

Un otro punto importante cu a wordo treci dilanti ta e necesidad di flexibilisa e leynan laboral mas pronto cu ta posibel, pa por mitiga e posibilidad di un crisis social mas severo. Ta crucial pa e dunado di trabou por tuma e decisionnan corecto door di tin mas flexibilidad y opcion pa asina por logra cu e daño cu e sector laboral ta wordo confronta cune keda na un minimo. KvK a trece dilanti cu ta sumamente importante pa brinda e posibilidad pa negoshinan cu a krimp durante e periodo di crisis por purba recupera den un forma flexibel y cu cautela. Si acaso ley no permiti pa un empleado por drenta den servicio pa un tempo limita y pa tin e opcion pa reduci e cantidad di ora di trabao, e recuperacion economico lo bay tuma hopi mas tempo. KvK ta opina cu ta esencial pa mehora e condicionnan di trabou di tal forma cu ta bira atractivo pa e dunado di trabou contrata un empleado.  KvK a referi tambe na e hecho cu, contrario na locual cu ley ta prescribi y cu ta un derecho di nos empresarionan, desde aña pasa Departemento di Labor (DAO) no ta acepta e peticionnan pa retiro di personal.

Por ultimo, KvK a presenta e sugerencia pa Aruba fungi como proyecto piloto den Caribe y crea e oportunidad pa e poblacion por vacuna den un periodo cortico, cu e meta pa promove Aruba como un destinacion mas safe y placentero.

E reunion a termina cu e deseo mutuo pa colabora riba aspectonan cu ta relevante pa ambos partido, esta tur tema cu lo contribui pa yega na e reformanan necesario pa recuperacion di nos pais Aruba.

Aruba, 11 di februari 2021

Camara di Comercio y Industria (KvK)

Scroll To Top