56-2019 -Un aña yen di actividad y cu hopi aporte na comunidad commercial: KvK ta resumi un 2019 cu hopi obstaculo y tambe desaroyo innovativo

Oranjestad – Yegando final di un otro aña, Camara di Comercio y Industria Aruba (KvK) kier tuma e momento pa refleha y repasa tur e logronan di 2019. E no tabata un aña sin su obstaculonan y esey sigur KvK a sa di confronta. KvK a demostra cu a traha duro y haci pasonan den e bon direccion y hunto cu esaki gana experencianan nobo. E tabata un aña cu comercio di Aruba a wordo confronta cu aspectonan cu ta complica e forma di haci negoshi. Hopi negoshi a habri pero tambe varios mester a cera nan portanan.

Registro di negoshi pa 2019

Pa aña 2019 a registra te cu 27 di december un total di 1259 negoshi y esaki ta mas cu e total te e mes un fecha pa 2018. Negoshinan cu a cera durante 2019 ta rond di 608 y esaki tambe ta mas cu loke a registra na 2018.

Di e negoshinan cu a registra durante 2019 por nota cu e sectornan di restaurant, holdings, negoshinan den real estate ta e top 3 mas registra. Otronan cu ta resalta ta negoshinan den sector di beyesa (beauty salons), construccion y restaurantnan chikito manera snack trucks.

E sectornan caminda por mira cu mas negoshi a cancela nan registro ta negoshinan di instalacion (awa, coriente, etc.), companianan di catering, restaurant y tambe negoshinan di beyesa.
E negoshinan cu a cera a indica cu e motibonan principal pa causa esaki ta cu actividadnan comercial a baha of cu no tin actividad mas, gastonan pa haci negoshi ta halto y problemanan financiero. KvK ta tuma nota di tur e informacion aki y lo uza esaki pa enfoca riba kico ta e problemanan principal y asina yuda na prolonga existencia di negoshinan den mas sector cu ta posibel y mantene un economia diversifica y sano.

Logronan di KvK durante 2019

KvK tin tras lomba un aña yena di diferente actividad pa yuda stimula e comercio na Aruba. Esaki a bay man den man cu cambionan interno cu ta na bienestar di e comerciante y clientenan di KvK. E cambio di mas impactante pa KvK ta e implementacion di e sistema di registro nobo y alabes e website moderno cu ta diseña pa e cliente por regla tur su asuntonan di su negoshi via e portal MyChamber. Hopi cliente ta mira e beneficio di por update e informacion y pidi extracto sin tin mester di bay oficina di KvK. E servicionan ta wordo mehora y a agrega tambe un chattool y di e forma aki diversifica con por comunica cu KvK pa cualkier asunto.

Durante 2019 KvK a duna aporte na diferente asunto di importancia tanto pa e comercio como e comunidad di Aruba. KvK den su rol como representante di e comerciante a vocifera su opinion den diferente proposicion di ley y tambe decision cu ta afecta e rumbo economico di nos pais. Di e forma aki tambe KvK a contribui y duna conseho extenso den loke ta e reforma fiscal, e ROP y ROPv, National Risk Assessment y ley di Serlimar pa menciona algun.

KvK a organisa diferente evento durante 2019 pa stimula y sigui contribui na un miho comercio cu ta yuda economia di Aruba. Di e forma aki a organisa Business Plaza – Step Forward! na januari y Business Plaza – Get Started! na juni. Tambe e gran evento anual Aruba Chamber Business Event cu un biaha mas tabata un exito rotundo. Otro eventonan cu a resalta durante 2019 ta e Townhall Meeting, diferente presentacion den auditorio di KvK y tambe cursonan manera Empresario Independiente y FAB (financiële administratie voor beginners) cu tin hopi interes di parti personanan cu kier sigui e curso aki y ta mira fruto di esnan cu ta sigui e cursonan.

Pa 2020 KvK kier sigui expande su servicionan y cu e introduccion di e chattool por spera un nivel mas rapido di servicio. KvK lo sigui traha riba e productonan digital via MyChamber pa clientenan tin miho control riba e detayes di nan negoshi. E colaboracion cu instancianan tanto den sector priva como sector publico lo haya mas atencion mirando kico tur a logra caba a base di transparencia y bon comunicacion entre diferente gremionan. Pa e aña cu ta den porta KvK ta yen expectativa positivo pa e desaroyo di e incubador comercial maneha door di ABIA (Aruba Business Incubator Island) cu lo crea mas oportunidad pa e empresario bin cu ideanan innovativo pa Aruba su sector comercial por sigui diversifica.

KvK ta contento di ricibi tur e opinionnan di e comerciantenan local y ta aprecia tur critica y conseho cu ta yuda na sigui drecha e servicio y mantene un sistema di registro moderno cu ta uno unico den nos region.

Nos kier recorda tur comerciantenan cu e factura pa e contribucion anual lo wordo manda solamente den version digital via e MyChamber account. Si acaso cu comerciantenan no a traha nan mes un account ainda, KvK ta urgi pa haci esey mas pronto cu ta posibel pa garantisa cu KvK por sigui brinda un servicio optimal. Directiva y staff di KvK kier desea pueblo di Aruba y e comunidad comercial un feliz y prospero aña 2020 y cu tur e bon deseo y metanan bira un realidad.

Aruba, 30 december 2019

Camara di Comercio y Industria (KvK)

 

Scroll To Top

Events

    Make an appointment

Sitemap | Privacy Policy | Disclaimer | By orbitalnets