49-2019 – E di 8 exposicion di arte na KvK ta habri pa publico: Apertura di  Exposicion di sra. Rani Varde na Camara di Comercio bon bishita

Oranjestad – Diabierna 1 di november Camara di Comercio y Industria Aruba (KvK) a tene e apertura oficial di su di ocho exposicion di arte. Cu e meta pa duna un aporte na artistanan local, e exposicion aki ta reemplasa e exposicion di sr. Van den Heuvel cu a keda exponi durante un aña na KvK.

Como artista local e aña aki a toca turno na sra. Rani Varde cu a presenta su obranan di arte hibando e tema “In search of peace”. Sra. Rani Varde ta naci na India y pa 24 aña caba e ta practicando y experimentando su creatividad via pintura. E ta expresa su herencia cultural den su obranan y ta inclui diferente elementonan cu ta refleha su personalidad. Pa Rani e ta un placer ora e por inspira otro personanan via su obranan. E ta sinti cu e momento cu e ta traha riba su obranan ta momentonan hopi special pe spiritualmente caminda e ta alabes inspira y asina tambe e a crea su propio estilo di pinta su obranan. Por mira mas di su obranan via su pagina di facebook artzbyrani of su instagram art_by.rani.

E apertura di ‘In search of Peace’ a conta cu presencia di varios empresario y interesadonan cu a bin pa admira e arte, cu por cierto lo keda exponi pa un aña largo na Camara di Comercio. E diabierna atardi aki tawata sigur uno hopi ameno caminda e bishitantenan a disfruta di snacks y bebida mientras nan por a aprecia e exposicion cu ta dorna e area di recepcion di KvK. Durante e anochi aki ya caba tawatin interes di coleccionistanan pa cumpra algun di e obranan di sra. Rani Varde.

Camara di Comercio ta gradici sra. Rani Varde pa acepta e invitacion y exhibi su obra di arte den nos edificio y ta invita un y tur pa pasa libremente durante oranan di oficina, di dialuna pa diabierna, entre 8:00 AM y 4:30 PM pa admira e pinturanan. Alabes KvK ta gradici tur cu a bishita e apertura di e exposicion.

Esnan interesa pa haya mas informacion tocante e posibilidad pa exhibi na KvK por manda un e-mail pa: businessinfo@arubachamber.com of yama na 582-1566 ext. 27/30/42.

Aruba, 4 di november 2019

Camara di Comercio y Industria (KvK)

Scroll To Top

Events

    Upcoming Events

    1. ATIA Annual Corporate Event 2019

      November 15 @ 7:00 pm - 11:00 pm
    2. Lecture KvK – Dutch Caribbean host country Emigration Expo 2020 – Netherlands

      November 18 @ 12:00 pm - 2:00 pm
    3. Latin American Congress of Ports (AAPA Latinoamerica)

      November 19 - November 21
    4. 19 Edition Expo Guajira 2019

      November 21 - November 23
    5. Handelsmissie en congres

      November 25 - November 30

    Make an appointment

Sitemap | Privacy Policy | Disclaimer | By orbitalnets