47-2019 – Apertura di e di 8 exposicion di arte na KvK dia 1 di november: sra. Rani Varde ta expone su bunita obranan na Camara di Comercio

Oranjestad – Pa algun aña caba Camara di Comercio y Industria di Aruba (KvK) ta duna su espacio na nos artistanan local y brinda nan e oportunidad di expone nan bunita creacionnan. Arte ta bin di inspiracion y ta stimula of por inspira otro tambe. E ta forma parti di e identidad di un persona, su cultura y pais. E biaha aki ta toca turno na sra. Rani Varde cu a haya e privilegio di dorna y embeyece e murayanan di KvK cu su obranan unico.

Diabierna prome di november pa 5’or di atardi KvK ta inaugura e exposicion oficialmente. Comunidad completo ta keda invita pa e inauguracion. Ariba e dia di inauguracion por admira e obranan den bon ambiente hunto cu un bebida y algun pasaboca. E obranan lo keda colga pa publico por pasa admira nan durante un periodo di un aña. Anteriormente KvK a expone obranan di sr. Van den Heuvel. Publico a disfruta di un variacion di creatividad di e artista. Pa e di 8 edicion aki KvK a invita sra. Rani Varde cu tin un creatividad basa riba su propio experiencia y origen. Sra. Rani Varde a nace na India y semper tabata facina cu arte. E ta expresa su herencia culturar den su obranan y ta inclui diferente elementonan cu ta refleha su personalidad. Pa Rani e ta un placer ora e por inspira otro personanan via su obranan.

Un elemento cu ta guia Rani den su bida diario ta e custumber di meditacion. E ta practicando esaki pa 24 aña caba y e ta sigui splica cu e sintimento cu esaki ta dune e ta expresa den su arte. E ta sinti cu e momentonan aki ta momentonan hopi special pe spiritualmente caminda e ta alabes inspira y asina tambe e a crea su propio estilo di pinta su obranan. Por mira mas di su obranan via su pagina di facebook artzbyrani of su instagram art_by.rani.

KvK ta gradici sra. Rani Varde pa acepta e invitacion y exhibi su obra di arte den e edificio di KvK. Si bo persona ta desea di ta presente riba 1 di november sea asina amabel pa yena bo registracion via e link https://arubachamber.com/pages/event/aruba-chamber-art-exhibition/. Un invitacion cordial ta bay pa un y tur pa pasa libremente durante orario di oficina, di dialuna pa diabierna, entre 8:00 AM y 4:30 PM pa admira e diferente obranan di arte. Alabes KvK ta invita un y tur pa bishita e apertura di e exposicion. Esnan interesa pa haya mas informacion tocante e posibilidad pa expone nan obra na KvK por manda un e-mail pa: businessinfo@arubachamber.com of yama na 582-1566 ext. 27/30/42.

Aruba, 25 di october 2019

Camara di Comercio y Industria (KvK)

Scroll To Top

Events

    Upcoming Events

    1. ATIA Annual Corporate Event 2019

      November 15 @ 7:00 pm - 11:00 pm
    2. Lecture KvK – Dutch Caribbean host country Emigration Expo 2020 – Netherlands

      November 18 @ 12:00 pm - 2:00 pm
    3. Latin American Congress of Ports (AAPA Latinoamerica)

      November 19 - November 21
    4. 19 Edition Expo Guajira 2019

      November 21 - November 23
    5. Handelsmissie en congres

      November 25 - November 30

    Make an appointment

Sitemap | Privacy Policy | Disclaimer | By orbitalnets