Kamer van Koophandel en Nijverheid Aruba | Chamber of Commerce and Industry Aruba

44-2019 -KvK ta informa durante conferencia di prensa: Comerciantenan cu sentimento mixto cu decision cu Gobierno a tuma apesar di conseho

Oranjestad – Diabierna 27 di september Camara di Comercio y Industria di Aruba (KvK) a tene un conferencia di prensa durante cua a expresa e sintimento di e comerciante riba e decision cu gobierno a tuma encuanto BBO cu ta afecta comercio y economia di Aruba. Minister a enfatisa cu BBO mester wordo inclui den e prijs y cu e comerciante tin e opcion pa mustra e parti cu ta di e BBO den e prijs riba e recibo.

KvK ta desapunta cu Minister a indica cu gobierno no ta comparti e punto di bista di KvK y no ta sigui e conseho di KvK y comercio. Den un reunion entre KvK y gobierno a splica elaboradamente riba e consecuencia y con e decision aki ta afecta tur e comerciantenan. KvK ta representa tur negoshinan registra y nan a expresa nan decepcion ora cu a tuma nota di e anuncio di Minister.

KvK a scucha e comerciantenan durante un recien Town Hall Meeting cu a wordo organisa den auditorio na oficina di KvK y a tuma nota di nan preocupacionnan y consehonan. KvK a publica diferente di e puntonan aki den medio di prensa pa mustra kico por considera como alternativa na propuesta di gobierno. Ta lamenta cu gobierno a dicidi contra conseho di KvK y no ta tene cuenta cu e consecuencianan cu KvK a anticipa. E consecuencianan aki ta afecta comercio y comunidad completo y e ta bira responsabilidad di gobierno pa carga. E poder di compra ta wordo afecta y e decision ta un impacto duro pa comercio. KvK ta teme e consecuencia cu esaki tin riba turismo en general.

Aruba, 27 september 2019

Camara di Comercio y Industria (KvK)

Scroll To Top