43-2019 – En conexion cu brinda conseho na parlamento pa proteha nos gremio: Ley nobo di Serlimar lo afecta KvK su registro di negoshi

Oranjestad – Diahuebs 19 di september directiva di Camara di Comercio y Industria di Aruba (KvK) a tene un reunion cu miembronan di comision di Staten encarga cu finansas, asuntonan economico y organizacion gubernamental (Statencommissie Financiën, Economische Zaken en Overheidsorganisatie). Den e reunion a elabora riba diferente punto cu KvK a trece dilanti encuanto e concepto di e Landsverordening di Serlimar y maneho di desperdicio. KvK a expresa na e miembronan di parlamento presente su preocupacionnan, preguntanan y sugerencianan riba e wetsontwerp aki. E reunion tabata fructifero caminda por a papia habri riba e tema y KvK ta gradici e comision pa e reunion.

Den e reunion KvK a trece varios punto dilanti y alabes a substancia esakinan cu splicacion extenso. Puntonan cu KvK a presenta ta pa haya claridad riba e rol cu Serlimar lo tin pa loke ta colecta desperdicio y si tin cierto exclusividad den recohe y procesa desperdicio. KvK a indica cu mester ta mas specifico riba cierto definicionnan cu ta wordo menciona den e concepto pa asina no perhudica negoshinan cu ta registra na KvK. KvK a indica no ta husto pa cobra e comerciante 300 Florin pa aña sin tene cuenta e cantidad di sushi cu cada negoshi ta produci relativamente na e tamaño y tipo di negoshi. E ta bira tambe un gasto extra pa e comerciante cu ya caba ta purba sobrevivi cu e gastonan halto pa haci negoshi. KvK ta teme cu mas negoshi lo haya na forsa pa termina y ta mira cu e ta stimula e circuito di negoshinan ilegal. E tarifanan den e proposicion ta basa riba normanan di Banco Mundial pero mester tene na cuenta pa ahusta esaki segun nos situacion pa loke ta por ehempel salario netto y otro factornan cu tin impacto riba impuesto. KvK a haci algun pregunta tambe pa loke ta e tarifa y e impacto cu esaki tin riba e sector di turismo. Esaki tin cu bay den un forma husto caminda no ta perhudica e sector y crea mas gasto. KvK a brinda e sugerencia pa calcula y cobra e gastonan na frontera riba e importacion. A base di loke Serlimar tin cu haya como ingreso ta calcula e percentahe cu ta cobra pa importacion na frontera pa cubri gastonan di Serlimar. Di e forma aki ta genera e fondo pa Serlimar por cumpli cu su tareanan di recohe y procesa desperdicio. KvK a menciona tambe cu gobierno mester keda habri y cu un incinerator no ta e unico opcion pa procesa sushi. Mester evalua hopi bon cua ta e miho solucion y kico e ta costa Aruba.

Un punto importante pa KvK ta cu e cobransa pa recoge sushi mester keda husto den e sentido cu esun cu ta crea mas desperdicio tin cu paga mas pa cubri e gastonan. Tampoco por ta asina cu ta cobra mas di un biaha pa recoge e mesun sushi. Door cu na Aruba no tin ley di competencia, KvK ta questiona si Serlimar lo haya un posicion di luho ya cu a base di loke ta indica den e diseño di ley e ta haci hopi dificil pa otro companianan drenta den e mercado y por competi riba e parti di procesa desperdicio.

KvK a haci uso di e oportunidad pa comparti su pensamento y solucionnan riba otro punto importante cu ta parti di e reforma fiscal. KvK a trece dilanti e propuesta pa bin cu cambio di ley di BBO pa esaki funciona sin un structura di impuesto acumulativo (tax on tax). Ademas ta conseha pa cobra un solo tarifa fiho y menciona esaki riba e factura. Tur e gremionan comercial ta para tras esaki y ta considera esaki un bon solucion pa wordo inclui den e reforma fiscal.

KvK kier gradici e comision y tur esnan presente. Miembronan di comision a duna indicacion di ta aprecia e aporta di KvK pa cu e reforma fiscal. KvK ta spera di por sigui duna conseho y cu via e reunionnan transparente por yega na fomula un bon reforma fiscal.

Aruba, 23 september 2019

Camara di Comercio y Industria (KvK)

Scroll To Top

Events

    Upcoming Events

    1. KvK workshop: Problem Solving

      October 18 @ 9:00 am - 1:00 pm
    2. KvK Networking Workshop

      October 23 @ 9:00 am - 12:00 pm
    3. OBTN – Energy Conference for the Guianas & Trade Mission

      October 24 - October 25
    4. International FDI Summit

      October 28 - October 30
    5. Kv Networking Workshop

      October 30 @ 8:00 am - 5:00 pm

    Make an appointment

Sitemap | Privacy Policy | Disclaimer | By orbitalnets