38-2018 – Apertura di e di 7 exposicion di arte na KvK

Oranjestad – Pa algun aña caba Camara di Comercio y Industria di Aruba (KvK) ta duna su espacio na nos artistanan local y brinda nan e oportunidad di expone nan bunita creacionnan. Arte ta bin di inspiracion y ta stimula of por inspira otro tambe. E ta forma parti di e identidad di un persona, su cultura y pais. E biaha aki ta toca turno na sr. Peter van den Heuvel cu a haya e privilegio di dorna y embeyece e murayanan di KvK cu su obranan.

Diabierna atardi 9 di november KvK a inaugura e exposicion oficialmente. E inauguracion tabata hopi bon bishita. Tur esnan presente por a admira e obranan den bon ambiente hunto cu un bebida y algun pasaboca. E obranan lo keda colga pa publico por pasa admira nan durante un periodo di un aña. Anteriormente KvK a expone obranan di muchanan di Stichting Mira. Por a disfruta di un variacion di creatividad di e studiantenan. Manera indica, pa e edicion aki KvK a invita sr. Van den Heuvel cu tin un creatividad hopi moderno y interesante. Naci na Oosterbeek, Hulanda sr. Van den Heuvel no tabata sa te na su 50 aña cu e tin talento. Pa su gran sorpresa y di su famia, e ta hopi bon den esaki tambe. Como cu e gusta musica, e ta gusta decora su canvas cu potretnan di artistanan pinta den acrylic. Su preferencia ta acrylic ya cu e clima di Aruba ta haci cu e ta tuma mucho tempo riba un pintura keda cla si e uza pintura di zeta. Pintamento ta dune trankilidad y e ta gusta wak su creacion bira un realidad.

Sr. Van den Heuvel ta traha su propio canvasnan y e gusta termina su obranan den 2 siman. Su prome stap ta escohe e colornan cu e kier pa resalta den e obra. Despues di esey e ta traha riba e detayenan cu e tono di e colornan y e ta finalisa door di pone vernis riba dje pa haci esaki uno duradero. Den 3 aña di tempo e la completa casi 70 obra y mayoria no ta pa wordo bendi pasobra e ta balora nan mucho hopi. E sa haci algun obra si a base di contract pero mayoria bes ta pa su pasion di pintamento. E gusta Aruba y su scenarionan historico y a pinta diferente obra di cayanan di Aruba den añanan 50 por ehempel.

KvK ta gradici sr. Peter van den Heuvel pa acepta e invitacion y exhibi su obra di arte den e edificio di KvK. Un invitacion cordial ta bay pa un y tur pa pasa libremente durante orario di oficina, di dialuna pa diabierna, entre 8:00 AM y 4:30 PM pa admira e diferente obranan di arte. Alabes KvK ta invita un y tur pa bishita e apertura di e exposicion. Esnan interesa pa haya mas informacion tocante e posibilidad pa expone nan obra na KvK por manda un e-mail pa: businessinfo@arubachamber.com of yama na 582-1566 ext. 27/42.

Aruba, 12 di november 2018
Camara di Comercio y Industria (KvK)

Scroll To Top

Events

    Upcoming Events

    1. Ecommerce Expo

      September 25 - September 26
    2. Aruba Chamber Business Event 2019

      September 27 @ 7:30 pm - 12:00 am
    3. International FDI Summit

      October 28 - October 30
    4. Latin American Congress of Ports (AAPA Latinoamerica)

      November 19 - November 21
    5. Handelsmissie en congres

      November 25 - November 30

    Make an appointment

Sitemap | Privacy Policy | Disclaimer | By orbitalnets