Kamer van Koophandel en Nijverheid Aruba | Chamber of Commerce and Industry Aruba

34-2019 – Gerencia di KvK ta informa: Directora di KvK ta anuncia su retiro den forma oficial.

Oranjestad – Camara di Comercio y Industria Aruba (KvK) ta informa cu su directora sra. Sonja Velthuizen a tuma su retiro algun siman atras. E motibo ta pa rasonnan personal. Sra. Velthuizen a dicidi cu despues di 8 aña na KvK di cua e ultimo 4 aña e la funciona como directora di KvK, e ta bay pa un reto nobo. Sra. Velthuizen a informa KvK di su decision cu basta luna di aviso pa KvK por tin tempo pa apunta un director nobo.

Reto nobo den sector priva

Sra. Velthuizen lo continua su carera den sector priva. E no tabata un decision facil pa sra. Velthuizen mirando cu den transcurso di e añanan cu e la traha na KvK e la crece y bira un persona hopi respeta y admira pa su maneho. Como directora di KvK e tabata semper na vanguardia di e empresario local y e ta yuda trece sector priva y sector publico mas cerca otro pa bienestar di comercio di Aruba. Tambe e la hisa e perfil internacional di KvK cu entre otro e organisacion di Kamers van Koophandel di Caribe Hulandes, relacionnan productivo cu KvK di otro paisnan di region y Merca, y tambe participacion na eventonan internacional cu a yuda trece innovacion den KvK. E coleganan y directiva di KvK sigur ta desea sra. Velthuizen hopi exito y ta gradici Sonja Velthuizen pa tur e experiencia y conocemento cu a comparti den e ultimo añanan.

Director nobo di KvK

Pa trece claridad riba ken lo bay asumi e puesto cu sra. Velthuizen ta lagando habri, KvK ta informa cu esaki lo ta den persona di sr. Martijn Balkestein. Sr. Balkestein ta un persona cu ta conoci pa su carera largo den ramo di economia y estadística, cu a eherce cu profesionalismo y integridad. Den pasado e la fungi como director di CBS y tin conocemento amplio riba e tereno di economia y data analysis. Esaki ta importante mirando cu KvK lo kier trece mas informacion dilanti a base di analisis di datonan di registro y e mercado.

Anteriormente caba sr. Balkestein tabata un di e candidatonan potencial cu a solicita pa e puesto di director. E biaha aki den e proceso nobo pa reemplasa sra. Velthuizen KvK a acerca e.o. su persona pa wak si e ta dispuesto pa asumi e reto y e la acepta.

KvK lo continua bou maneho di un director nobo cu sigur lo continua cu e bon trabou cu e director anterior a sa di brinda.

Aruba, 21 di augustus 2019

Camara di Comercio y Industria (KvK)

Scroll To Top