32-2019 – KvK hunto cu otro gremionan comercial a reuni cu Minister di Medio Ambiente encuanto e plan integral pa maneha desperdicio

Oranjestad – Camara di Comercio y Industria Aruba (KvK) a ricibi un invitacion di Minister di Infrastructura y Medio Ambiente encuanto un presentacion di e plan integral pa maneho di desperdicio na Aruba. Tambe tabata presente na e reunion aki ATIA, AHATA, ATSA, SNBA, WEB y Serlimar.  Como respresentante di sector priva, KvK su rol durante esaki ta pa crea espacio empresarial atractivo y atrae inversionnan cu ta contribui na economia di Aruba. KvK ta para tras di e desaroyo di un miho legislacion y reglanan stipula door di gobierno cu ta yuda na brinda miho servicio di e sector publico.

KvK ta hopi agradecido pa e oportunidad cu e Minister a ofrece na e diferente gremionan pa asina por dialoga y den un forma transparente yega na loke ta e miho solucion pa e maneho di desperdicio. KvK ta para tras di comercio na Aruba y esey ta inclui cu na Aruba nos tin un sistema basa riba “free enterprise” y cu e mercado mester keda habri den un forma competitivo. Banda di esey KvK ta apoya e idea di gobierno actual caminda cu ta propaga solucionnan sostenibel y na bienestar di nos medio ambiente.

Pa KvK e ta importante cu e focus mester keda na elimina e dump di Parkietenbos y otro dumpnan illegal rond Aruba, haya solucion pa tur e buraconan habri unda hende ta tira sushi, y bin cu solucionnan circular. KvK a acerca e Minister pa mira si Minister Oduber ta habri pa otro alternativanan banda di e solucion di un incinerator pa asina evalua kico berdaderamente ta e miho solucion. Minister ta compromete su mes cu e ta habri pa ricibi otro solucionnan cu no ta e incinerator. E ta importante si cu mester bin cu un solucion cu ta factibel, sostenibel y practico entre otro. Via KvK sector priva por bin dilanti cu su sugerencianan. Pais Aruba kier atrae inversionistanan y cualkier accion cu wordo tuma caminda por crea e percepcion cu sector publico kier afecta con negoshi internacional tin cu tuma luga por afecta e confiansa y credibilidad den Aruba y comercio di Aruba lo sinti e consecuencia di esaki.

E propuesta cu a wordo presenta ta un decision cu a wordo posponi pa mas cu 19 aña caba y KvK ta conseha cu prome cu bin cu cambio den ley encuanto maneho di desperdicio, ta bon pa considera tur e aspectonan y tene un participacion habri cu tur gremio concerni. Un decision den cambio di ley aki lo afecta futuro generacionnan di Aruba den su totalidad y esey ta inclui e pueblo, consumidornan y nos turistanan.

Minister a indica cu e ta compromete su mes cu prome cu tuma cualkier decision encuanto maneho di desperdicio y cuanto e “tipping fee” lo bira, e lo sinta atrobe cu e gremionan commercial. KvK ta boga cu mester cobra den un forma indirecto, den forma di impuesto na frontera. Asina tin 100% conformidad di impuesto y e ta hopi mas facil pa maneha. KvK ta boga cu e punto aki mester forma parti di e Reforma Fiscal cu gobierno lo introduci. KvK kier mira cu tin transparencia den loke ta e solucion pa maneho di desperdicio y cu na fin di dia e ta un inversion cu ta crea un situacion di “win-win” pa sector publico y sector priva.

Aruba, 2 di augustus 2019

Camara di Comercio y Industria (KvK)

Scroll To Top

Events

    Upcoming Events

    1. Workshop: Basic Data Analysis for Business

      August 20 @ 9:00 am - 1:00 pm
    2. CINEX Smart Investment Summit 2019

      August 28 - September 29
    3. Miacon Construction Show 2019

      September 15 - September 17
    4. Aruba Chamber Business Event 2019

      September 27 @ 7:00 pm
    5. Handelsmissie en congres

      November 25 - November 30

    Make an appointment

Sitemap | Privacy Policy | Disclaimer | By orbitalnets