Kamer van Koophandel en Nijverheid Aruba | Chamber of Commerce and Industry Aruba

31-2018 – Exitoso prome Aruba Chamber Town Hall Meeting

Oranjestad – Diaranson 5 di september a tuma luga na Centro di Bario Dakota e prome Aruba Chamber Town Hall Meeting. E re aki organisa door di Camara di Comercio y Industria di Aruba (KvK) ta pa brinda oportunidad na e empresario pa por comparti su pensamento y puntonan di preocupacion pa loke ta e situacion empresarial di Aruba. KvK kier asina pa comerciantenan contribui tambe na posibel solucionnan pa e obstaculonan cu nan ta confronta cune na momento di haci negoshi.

E moderador pa e anochi tabata sra. Cherryldine Buckley cu a structura e anochi den un forma hopi profesional y asina mantene e topiconan al caso y indicando na e publico cu nan contribucion den forma di un solucion pa e problema ta wordo anota door di KvK y treci dilanti den e whitepaper cu KvK a traha. E whitepaper ta un documento cu KvK a traha a base di diferente renan tanto cu sector publico como sector priva riba kico ta importante pa comercio na Aruba.

E Town Hall Meeting tabata uno hopi interactivo caminda cu a duna oportunidad pa haci algun pregunta riba cua KvK a duna contesta pa asina duna e publico presente un idea cu KvK no ta para keto y ta luchando pa logra ehecuta ideanan cu sigur ta beneficia comunidad y comercio. Di e forma aki a trece dilanti con KvK a percura pa trece instancianan bancario hunto y asina pusha pa facilita servicionan di transaccion di cual discusionnan pa cu online payment ta den un fase avansa. Tambe cu KvK a urgi Minister di e Gobierno anterior pa pone un moratorio riba supermercadonan mirando cu door di falta di control no por haci mucho cos pa maneha e cantidad di supermercadonan na Aruba. KvK ta contento cu e moratorio a drenta na vigor y cu ainda ta vigente y cu e decision aki tin apoyo y comprension di pueblo.

Hopi di e puntonan cu a bin dilanti ta resona cerca KvK. Akinan por menciona puntonan di preocupacion manera burocracia incoregibel, competencia illegal, bouwvergunning cu no ta keda cla of ta tarda mucho hopi, exigencianan extravagante y permisonan cu hopi contratiempo. Tur esaki ta duna KvK e confiansa cu consehonan cu kier trece dilanti cerca Gobierno ta conta cu apoyo di e comerciante. Asuntonan di lanta negoshi, concurencia di negoshinan illegal, crea level playing field, incentivanan pa e profesional, uso di tecnologia, e-commerce y negoshinan online ta algun di e puntonan cu mester su debido atencion. Durante e anochi KvK a tuma nota di e sugerencianan cu a bin dilanti cu e intencion di facilita comercio. E intencion ta pa e forma aki duna mas forma na yega na solucionnan practico pa problemanan y obstaculonan existente.

KvK y su Directiva ta hopi agradecido na e personanan cu a tuma nan tempo pa asisti na e re aki. Alabes KvK ta hopi satisfecho y ta aprecia hopi e participacion durante e prome Town Hall Meeting. KvK lo haci bon uso di e informacion cu a wordo comparti e anochi aki. Intencion di KvK ta pa continua cu eventonan similar cu ta duna oido na e pueblo empresarial. Di e forma aki ta canalisa e preocupacion y tambe e solucion cerca Gobierno y Parlamento. E ta keda e ora na nan pa dicidi si nan ta mira e conseho como algo cu nan por ehecuta y cu por contribui na bienestar general.

Pronto KvK lo presenta un update riba su white paper y lo percura pa envolve sector priva y sector publico mirando cu pa yega na exitonan practico e ta necesario pa uni forsa y enfoca riba un solo meta. Si tin sugerencia por semper tuma contacto cu KvK y trece esaki dilanti. Tin hopi keho pero kier enfoca riba solucion den e white paper. E white paper actual ta disponibel riba e website di KvK y por download esaki for di nos website via www.arubachamber.com/downloads/reports.

Aruba, 10 september 2018
Camara di Comercio y Industria (KvK)

Scroll To Top