26-2018 – KvK a reuni cu representante di Ministerio di Transporte y di Icasus

Oranjestad – Camara di Comercio y Industria di Aruba (KvK) a tene un re dia 27 di juni cu Sres. Luigi Bergen y Anuar Laclé di Ministerio di Transporte, Comunicacion y Sector Primario (TCSP) y Sres. Ton Janssen y Rafael Estrada di Icasus Caribbean. E representantenan a elabora riba e desaroyonan pa formalisacion di un fast ferry entre Aruba, Boneiro y Corsow. KvK ta hopi agradecido cu e re y ta para tras di e fast ferry y e oportunidadnan cu e por crea pa Aruba y su comercio.

Ta tene cuenta cu tur posibel stakeholder encuanto un fast ferry
Sr. Bergen a splica cu Minister di TCSP kier reuni cu tur organo cu ta wordo afecta cu introduccion di un fast ferry na San Nicolas. Di e forma aki a tene re caba cu entre otro Immigracion y Aduana. Según plan lo kier reuni tambe cu RDA, Citgo, Directie Scheepvaart, GNC y Kustwacht entre otro. Pa e proyecto e ta importante pa scucha nan punto pa asina por ehecuta un plan debidamente.

Estimulo pa San Nicolas
KvK ta contento cu e iniciativa di un fast ferry ta wordo pusha pa bira un realidad. E ta contribui tambe na crea y stimula comercio na San Nicolas. Sr. Janssen a duna un presentacion caminda a splica over diferente analysis cu nan a haci pa por tin tur e condicionnan faborabel pa un fast ferry por funciona. Ya caba nan a bishita Boneiro y Corsow cu a mustra di ta hopi positivo y ta para tras e proyecto di fast ferry. Boneiro tin algun asunto cu mester atende prome cu por participa na esaki pero Corsow di su banda a indica di ta para tras e proyecto di fast ferry. A menciona cu e asociacionnan di turismo di Corsow y di Aruba tambe ta apoya mirando cu esaki ta trece cune mas oportunidadnan cu ta yuda pa turismo por crece.

A acerca e compania cu ta opera na islanan Canarias mirando e similaridadnan cu esaki tin cu nos situacion geografico. E compania a indica cu ta wak e como un proyecto beneficioso pa nos islanan y ta basa esaki riba e exito cu e ferrynan a crea door di trece e islanan Canarias mas cerca di otro. E impacto di e fast ferry akinan ta di tal magnitud cu e ciudadanonan no por imagina nan vida diario mas sin e posibilidad cu e fast ferry ta brinda.

A indica cu awo ta e momento pa crea un ruta entre e islanan facilita door di un fast ferry. Cu apoyo di gobierno esaki lo por bira un realidad pa fin di 2019.

KvK ta hopi satisfecho cu e presentacion y cu ta tene cuenta cu tur factornan, oportunidadnan y tambe e risiconan cu esaki por tin. Comercio di Aruba sigur por probecha di un fast ferry y pa e motibo aki KvK ta apoya e proyecto di fast ferry entre e islanan ABC.

Aruba, 2 di juli 2018
Camara di Comercio y Industria (KvK)

Scroll To Top

Events

    Make an appointment

Sitemap | Privacy Policy | Disclaimer | By orbitalnets