22-2019 – KvK ta pidi pa keda prudente encuanto decisionnan pa reforma fiscal; KvK: BBO/BAZV/BAVP mester keda riba recibo pa evita mas gasto indesea pa pueblo

Oranjestad – Camara di Comercio y Industria (KvK) tin entendi cu gobierno kier elimina BBO/BAZV/BAVP (impuesto indirecto) for di recibo y pa e motibo aki KvK kier trece dilanti e importancia di pakico BBO (impuesto indirecto) y e otro belastingnan tin cu keda visibel riba recibonan.

KvK ta para firme riba e punto cu BBO (impuesto indirecto) y demas mester riba recibo keda pa motibo cu e tin hopi consecuencia costoso pa economia, administracion di negoshi, inflacion.  Asina por menciona contratonan di huur y entrega di producto y servicio cu no por wordo kibra sin mas. Nan tin un articulo cu ta aplica prijs pa meter/peso/unit y otro articulo cu ta bisa cu Aruba e prijs ta pone impuesto indirecto. Negoshinan di fastfood of restaurantnan asocia cu hotelnan tin contratonan di duracion largo cu ta haci cu dificilmente un negoshi por sali di nan sin sufri gastonan grandi. Den contratonan aki e prijs di e producto ta wordo menciona cu e compania local tin cu tene na dje y tanto e hotel como e restaurant kier keda competitivo.

Hunto cu esaki mester tene na cuenta cu negoshinan lo haya nan mes confronta cu hopi molester administrativo cu tambe ta crea mas gastonan. Hopi negoshi lo hayanan forsa na hisa nan prijsnan y na final no ta brinda un solucion practico y tampoco transparente. Si no inclui e impuestonan riba e recibo, e negoshinan lo tin cu cambia tur prijs di nan producto den nan sistema y tambe riba nan rekinan. Esaki ta costa hopi ora di trabou y no ta algo cu un negoshi tin inclui den su budget y pues e ta bira un gasto extra. Nos ta papiando di cientos di miles di producto riba reki. Contando tambe e gasto extra di overtime pa cambia prijs despues di cera negoshi.

Companianan na Aruba ta semper purba di tene consideracion y cumpli cu e rekisitonan di impuesto pa loke ta BBO, BAVP y BAZV y hopi ta premira cu BBO of cualkier otro impuesto lo keda forma parti di prijs y cu semper lo presenta momentonan di cambio den e percentahenan di e impuesto. Cu esaki kier indica cu mester traha den un forma practico, di forma cu negoshinan por mantene prijsnan transparente pa e consumidor y ora cambio presenta den tarifanan di impuesto indirecto cu esaki ta visibel tambe riba e recibo. Sector priva no por wordo obliga pa sconde e impuesto den e prijs di su producto of servicionan pasobra e lo mustra manera ta e comerciante ta subi su prijsnan. Siendo cu esaki no ta e caso pero ta e impuestonan ta subi prijs pa por cubri e deficit di gobierno. Mester tene na cuenta tambe e concurrencia fuerte cu e comerciante local tin cu e plataforma di mercado online caminda cu productonan tin prijs mas competitivo y esakinan no ta cumpli cu BBO, BAZV of BAVP y ta keda sin aporta na caha di gobierno. Tambe ta competi cu shopping na mall na Miami caminda no ta cobra pa parkeer y ta aplica sales tax un biaha so na e recibo di compra di e cliente final. Wholesaler ni importador no ta paga sales tax na merca.

Un otro topico cu KvK kier trece dilanti ta cu den e ultimo tempo por a nota varios instrumentonan cu ta wordo introduci cu tin relacion cu medidanan. Asina tin por ehempel e incremento di minimum loon cu ta afecta gasto di negoshinan pa cumpli cu salario minimo, tarifanan pa piki sushi caminda comercio tin otro tarifa cu piki sushi domestico pero no ta tene cuenta y no ta distingui entre e negoshinan cu ta produci tiki of hopi mas sushi. Por ehempel un consultant trahando cu un computer lo paga casi mescos cu un minimarket cu ta produci hopi caha bashi. A introduci e “Sin tax” y tin mas impuesto proponi manera e “Sugar tax”.

Por ehempel cu un “Sugar Tax” lo mester cambia prijs di bebida di tur menu di tur restaurant na Aruba. Extension di e prohibicion riba saco di plastic cu foam boxes sin trece un solucion economico pa e comerciante pa por remplasa e uso di e productonan aki cu pa ley no mag wordo usa mas. Anteriormente KvK a indica cu sector priva di Aruba ta paga bon, pero pa motibo principalmente di impuestonan halto (awa, coriente y telefoon na Aruba tin prijs di mercado internacional) e poder di compra ta menos.

KvK ta haya importante pa trece un reforma fiscal. Pero pa e comerciante y e pueblo di Aruba e ta importante cu esaki ta transparente y practico. Decisionnan cu gobierno ta tuma mester tin un base caminda a scucha di e comunidad y tambe e consehonan y preocupacion di e comerciantenan. E no por ta asina cu sector priva ta esun cu na fin di dia lo mester bay carga tur e gastonan y consecuencia fastiosonan aki.

Aruba, 24 di mei 2019

Camara di Comercio y Industria (KvK)

Scroll To Top

Events

    Upcoming Events

    1. EXPOCARIBE 2019

      June 19 - June 22
    2. CAACM 13TH CONFERENCE AND AGM 2019

      June 27 - June 28
    3. Business Plaza-Get Started!

      June 29 @ 9:00 am - 2:00 pm
    4. Miacon Construction Show 2019

      September 15 - September 17
    5. Handelsmissie en congres

      November 25 - November 30

    Make an appointment

Sitemap | Privacy Policy | Disclaimer | By orbitalnets