20-2020 – Eleccion anual di miembro di directiva di KvK

Oranjestad – tur aña Camara di Comercio y Industria (KvK), conforme e stipulacionnan den e Ordenanza KvK y e Ordenanza di Eleccion di KvK, ta tene eleccion di directiva segun un schedule fiho y un sistema rotativo, unda cada bes 3 di e 9 puestonan ta bira vacante. Esaki ta crea oportunidad pa miembro nobo drenta directiva pa contribui na e trabao y metanan di KvK, pero na mesun momento manteniendo continuidad den e directiva. E miembronan cu nan periodo ta bay termina tambe por pone nan mes reeligibel si asina nan ta desea.

E posicion como miembro di directiva di KvK ta a base boluntario y gratuito, cu a cambio ta duna oportunidad di ta envolvi y di siña mas di cerca con nos economia ta desaroya y di e manera aki yuda KvK cumpli cu su tareanan conforme ley y enfoca riba e necesidadnan y interes general di nos comunidad empresarial. Participacion activo y afinidad cu e sector priva y e diferente temanan di importancia pa negoshi y nos economia ta esencial.

KvK ta un entidad huridico “sui generis” cu tareanan asigna pa ley, e.o. representa e interes general di comercio y industria di Aruba, maneho di e registro oficial di negoshi y fundacion y duna conseho na Minister di Asunto Economico encuanto otorgamento di permiso di establecimento di negoshi y tambe tocante asuntonan socio-economico y financiero. Alabes, KvK tin e custodia di e cuentanan anual di NV, AVV y VBA cu tin obligacion legal pa deposita esakinan na KvK. Fuera di esey, KvK ta duna apoyo y informacion na empresarionan, tanto esun principiante como esun estableci caba y ta brinda informacion economico/comercial na inversionista y empresarionan local y di exterior. KvK ta organisa diferente actividad, manera charla, curso, seminario y mision comercial. Tur esaki pa contribui na un desaroyo economico sostenibel pa Aruba.

Actualmente interesadonan pa bira miembro di directiva KvK por pasa na KvK pa busca e pakete di documento di inscripcion/postulacion como candidato. Den e periodo di 1 te cu 14 di november 2020 por entrega e formulario di candidatura na KvK cu por lo menos 15 firma di votado cu ta sostene e candidato. E votadonan aki ta esnan cu tin puesto di responsabilidad den empresa y cu ta registra riba e listanan di “Kleinbedrijf” y “Grootbedrijf” cu KvK a publica y cu ta disponibel tambe riba nos website: www.arubachamber.com Pa mas informacion tocante eleccion pa directiva di KvK, por comunica tambe cu Secretariado na tel. 582-1120, ext. 29.

Aruba, 29 di october 2020

Camara di Comercio y Industria (KvK)

Scroll To Top

Events

    Upcoming Events

    1. KvK online session: Dissolution of a legal entity

      December 8 @ 10:00 am
    2. KvK online session: ‘Dissolution of a legal entity’

      December 10 @ 10:00 am - 12:00 pm
    3. World of Trade, Travel & Taste Expo

      May 13, 2021 - May 15, 2021

    Make an appointment

Sitemap | Privacy Policy | Disclaimer | By orbitalnets