19 – 2021-CAMARA DI COMERCIO TA CELEBRA “90+1 YEARS”
Oranjestad – Diaranson 8 di September 2021 ta cumpli 91 aña cu Camara di Comercio y Industria Aruba (KvK) a keda estableci oficialmente como e cuerpo representativo di Aruba su comunidad empresarial.
Aña pasa KvK a alcansa e gran ‘milestone’ di 90 aña di existencia, cu lastimamente pa motibo di nos situacion actual mundial no por a wordo celebra. Sin embargo, nos no kier laga esaki pasa sin haya su debido atencion y conmemoracion. Pesey awe nos tin un ‘double celebration’ di 90+1 years, unda nos ta recorda cu aña pasa, 8 di September 2020, KvK a cumpli 90 aña di existencia y awe, 8 di September 2021, a cumpli un aña mas. Como toque di celebracion a crea un esfera decorativo den e area di recepcion na KvK y tambe a treat cupcakes na tur cliente cu a bishita oficina di KvK ariba e dia aki.
Den transcurso di añanan KvK su tareanan y representacion di comercio sigur a desaroya y crece unda cu ademas di su funcion pa cumpli cu e ley di establecimento di negoshi na Aruba, ta fungi cada dia mas como un fuente valioso di guia y sosten pa e empresario riba varios aspecto. Contando cu expertisio y dedicacion di un equipo dinamico cu ta consisti tanto di e hunta di Directiva como tambe e empleadonan di e organisacion, KvK ta sigi percura pa cumpli cu su metanan y vision proponi.
Comercio mundialmente ta enfrentando situacionnan cu hopi reto y e impacto di e pandemia ta uno grandi pa nos companianan local tambe. Apesar di esaki KvK su proposito pa futuro sercano ta pa mantene e positivismo y union entre partners principal den comercio y hunto continua den un direccion pa inovacion y mehoracion continuo di nos clima empresarial.
Cu e dia festivo aki pa Camara di Comercio nos kier felicita tambe cada un di nos empresarionan y sector comercial completo cu tur dia ta contribui na economia di pais Aruba!
Aruba, 8 di september 2021
Scroll To TopEvents
Upcoming Events
Make an appointment
