Kamer van Koophandel en Nijverheid Aruba | Chamber of Commerce and Industry Aruba

17-2019 – E cambio di sistema di registro di KvK den su periodo transitorio: KVK CU INFORMACION ENCUANTO DESAROYO DI SISTEMA NOBO

Oranjestad – Camara di Comercio y Industria (KvK) ta den e proceso pa formalisa su sistema di registro nobo. Despues di lunas trahando riba e sistema digital nobo awo a yega e punto pa brinda pueblo e oportunidad pa cera conoci y orienta nan mes cu e sistema nobo. E sistema nobo ta duna e comerciante e libertad pa maneha su propio datonan pa su negoshi via su propio cuenta. Un punto cu e lo brinda ta e facilidad di no mester bay na oficina di KvK pa haci cierto cambionan den negoshi pero por haci esaki unda cu ta via bo computer, smartphone of tablet cu acceso di internet. Pa logra esaki mester crea y activa bo cuenta via website di KvK www.arubachamber.com y akinan drenta via e portal ‘My Chamber’.

Formulario ta wordo reemplasa

Den pasado te cu prome cu implementacion di e sistema nobo mester a yena un formulario pa completa bo peticion encuanto negoshi registra na KvK. E sistema nobo ta elimina e uzo di formulario riba papel y ta reemplasa esaki cu yena e informacion via ‘My Chamber’. KvK ta compronde cu ainda por tin cierto formulario den circulacion mirando cu por tin peticion cu ainda ta den proceso pa por completa e registro di un negoshi. Pa e casonan particular aki KvK ta ofrece un periodo extendi via cua por entrega formulario ainda. KvK kier pa pueblo tene na cuenta si cu te dia 28 di juni 2019 lo por sigui tuma formulario pero despues di e fecha aki lo bay over completamente via e sistema di registro nobo.

Crea bo account

Pa por haci uzo di e servicionan via e portal ‘My Chamber’ e ta importante pa crea bo account. Pa crea bo account bo mester tin un e-mail adres valido. Riba website www.arubachamber.com bo ta haya e link ‘My Chamber’. Via esaki bo ta yega riba e portal unda bo mester crea bo account. Unabes bo a crea bo account bo tin acceso na informacion via e portal. Via e portal por regla tur asunto di bo negoshi, cumpra extracto y mucho mas. Via e portal mes por haci pago pa diferente servicio di KvK tambe y di e forma aki ricibi productonan digital.

Extracto nobo

E sistema nobo ta haci cu bo no mester pasa na oficina di KvK pa busca bo copia di extracto di negoshi. Unabes e peticion wordo procesa, e sistema ta crea un extracto digital y e cliente ta haya esaki den su portal via su account di ‘My Chamber’. E cliente mes por print esaki si e ta necesario. E extracto nobo ta bin cu un barcode cu ta indica su validez. Pa verifica e extracto mester subi riba website di KvK y bay riba “Validate an extract”. Si ta riba smartphone of tablet, por scan e barcode, of copia e link pa valida y si ta tras di un computer por yena e codigo manera e ta mustra riba e documento. Di e forma aki por controla si e extracto ta uno valido. Tene na cuenta cu e documento aki tin un validez di un luna.

Si tin cualkier pregunta of mester ayudo cu bo account, manda un e-mail na support@arubachamber.com splicando bo situacion. KvK ta aprecia tur feedback como cu esaki ta contribui na mehora e calidad di servicio.

 

Aruba, 18 di april 2019

Camara di Comercio y Industria (KvK)

Scroll To Top