12-2023 – KVK TA YUDA ORGANISA MISION COMERCIAL VIRTUAL ENTRE ARUBA Y VENEZUELA
Oranjestad – Recientemente, Camara di Comercio y Industria (KvK) den colaboracion cu Minister di Asuntonan Economico, sr. Geoffrey Wever, a organisa un Business Matchmaking virtual entre empresarionan di Aruba y Venezuela. E evento aki a ser organisa cu e fin pa crea mas laso comercial entre Aruba y Venezuela y alabes brinda mas atencion y crusa e fronteranan comercial entre e dos paisnan aki.
Pa prome biaha den historia a tuma lugar un mision comercial na Aruba completamente virtual, na unda a participa 30 empresario di Aruba y mas di 100 empresario di Venezuela. Empresarionan na Venezuela tin hopi interes den crea lasonan comercial cu empresarionan na Aruba.
E evento a tuma luga den auditorio di KvK, riba 9 di november ultimo, cu un agenda extenso. Sr. Geoffrey Wever, Minister di Asuntonan Economico, a inicia e programa, sigui pa Presidente di Directiva di KvK, sr. Gavril Mansur, cu a duna tur presente un caluroso bonbini y a bisa algun palabra. Sra. Ivy Correa tawata e moderador di e evento aki y a introduci tur e representantenan di ambos pais cu a elabora riba diferente topiconan interesante encuanto e posibilidadnan di haci negoshi cu Venezuela. E representantenan di diferente sector comercial di Venezuela a elobora riba loke nan tin di ofrece pa loke ta servicionan pa salud y turismo. Alabes, e representantenan a elabora riba e diferente opcionnan y variedad di productonan (p.e. fruta y berdura) y materialnan di construccion cu Venezuela tin pa ofrece y cu por wordo considera pa importacion na Aruba.
Despues di merdia, tur empresario di Aruba cu a registra, por a subi online via Zoom, y topa virtualmente cu empresario di Venezuela na unda e empresarionan di Venezuela a elabora riba loke nan tin di ofrece. For di merdia te cu atardi, diferente citanan a tuma luga y por a intercambia ideanan y informacion. KvK ta hopi satisfecho mirando e interes di ambos banda pa haci negoshi.
KvK por wak bek na dos mision comercial exitoso cu a tuma luga e aña aki, den luna di mei na Colombia, y awo un virtual cu Venezuela.
KvK ta contento di un biaha mas por a traha cu Minister sr. Geoffrey Wever y di e forma aki brinda mas oportunidad na nos empresarionan local. Alabes KvK ta gradici Minister sr. Geoffrey Wever pa haci e mision virtual aki posibel. Tambe un danki na tur e empresarionan di Aruba y Venezuela cu a participa den e evento aki.
Aruba, 13 di november 2023
Camara di Comercio y Industria (KvK)
Events
Make an appointment
