09-2023 – KVK TA INFORMA ASOCIACIONNAN RIBA NAN POSICION LEGAL
Oranjestad – Riba 1 di januari 2021 Buki 2 di e Codigo Civil di Aruba a drenta na vigor y esaki a trece cambio den e posicion legal di asociacionnan. Camara di Comercio y Industria Aruba (KvK) kier a informa e asociacionnan riba e consecuencia di e cambionan aki. Pa limita e responsabilidad di e dirigentenan di e asociacion, mester inscribi e asociacion den e Registro Comercial (Handelsregister) na KvK.
Tur asociacion a adkiri entidad legal
Cu e implementacion di Buki 2 di e Codigo Civil di Aruba, tur asociacion a adkiri entidad legal (rechtspersoonlijkheid). Buki 2 ta haci distincion entre asociacionnan cu autoridad legal completo (volledige rechtsbevoegdheid) y asociacionnan cu autoridad legal limita (beperkte rechtsbevoegdheid). Asociacionnan cu no tabatin entidad legal prome cu Buki 2 a drenta na vigor, a wordo automaticamente converti den asociacionnan cu autoridad limita. Pues, den e sistema nobo e asociacion sin entidad legal no ta figura mas.
Asociacion cu autoridad legal completo mester wordo inscribi na KvK
E asociacion cu autoridad legal completo ta wordo constitui via acta notarial den cual e statuto ta wordo inclui. E asociacion por tin e mesun derecho y contrae debernan manera cualkier cuidadano, por ehempel adkiri un propiedad registra of ta un heredero. E asociacion mes ta responsabel pa cualkier debe y e dirigentenan en principio no. Tin e obligacion legal pa inscribi e asociacion cu autoridad legal completo den e Registro Comercial na KvK.
Asociacion cu autoridad legal limita por wordo inscribi na KvK
E asociacion cu autoridad legal limita (tambe conoci como ‘informele vereniging’) no ta wordo constitui via acta notarial. E asociacion no por adkeri propiedad ni tampoco por ta un heredero. E dirigentenan ta en principio – ademas di e asociacion – individualmente responsabel pa cualkier debe. No tin e obligacion legal pa inscribi e asociacion cu autoridad legal limita den e Registro Comercial na KvK, pero esaki si ta posibel. Door di inscribi e asociacion cu autoridad legal limita den e Registro Comercial, por limita e responsabilidad di e dirigentenan. Pa e motibo aki, KvK ta urgi tur dirigentenan di asociacionnan cu autoridad legal limita pa inscribi e asociacion den e Registro Comercial na KvK.
Inscripcion den e Registro Comercial
Ora inscribi e asociacion den e Registro Comercial na KvK tin e obligacion di paga e costo di inscripcion, y despues di 1 aña di inscripcion, mester cumpli cu e contribucion anual. Pa inscribi un cambio den e statuto, tambe tin un contribucion aplicabel.
Costo aplicabel
E costo di inscripcion y e contribucion anual ta stipula den e Ley di Registro Comercial y ta lo siguiente:
-Costo di Inscripcion (un biaha) Afl. 96,00.
-Contribucion anual Afl. 96,00.
Atencion: Pa asociacionnan comercial por tin otro sumanan aplicabel.
-Costo pa inscribi cambio den statuto (pa cada cambio) Afl. 56,00.
Pa completa, fabor di tuma nota cu un asociacion di propietarionan (Vereniging van Eigenaars), cu ta cay bao di otro entidad legal cu derecho priva, tambe tin e obligacion di wordo inscribi den e Registro Comercial na KvK. Costo di inscripcion y di e contribucion anual tambe ta aplicabel.
KvK kier recorda cu e contribucion anual conforme ley mester wordo paga prome cu 15 di maart di cada aña. Si acaso no a haci e pago di e contribucion anual di 2023, fabor di haci e pago mas lihe posibel, pero no mas laat cu 31 di augustus 2023. Pa cualkier pregunta of informacion tocante bo cuenta pendiente, por tuma contacto via e-mail na financial@arubachamber.com of por yama na 582-1566 ext. 336/343.
Aruba, 28 di juli 2023
Camara di Comercio y Industria (KvK)
Scroll To Top
Events
Make an appointment
