09-2018 – KvK a reuni cu San Nicolas Business Association
Oranjestad – Riba 28 di februari ultimo Camara di Comercio y Industria di Aruba (KvK) a tene un re cu San Nicolas Business Association (SNBA). E re aki tabata pa mira con desaroyonan a sigui despues di un re den pasado y pa hunto discuti riba desaroyonan cu a tuma luga na San Nicolas den e ultimo tempo. E re tabata uno fructifero y a bay den bon ambiente. Den cuadro di sostene empresario local KvK a tuma e iniciativa pa invita SNBA pa tene e re aki na O’Neills Kitchen situa na San Nicolas. Intencion di KvK ta pa duna sosten na diferente sector y empresario por medio di dialogo y a base di tene re den un atmosfera empresarial.
A papia estrechamente di e rol di KvK y con hunto SNBA lo por traha na mehora loke ta brinda na e pueblo di San Nicolas. SNBA a trece dilanti e importancia pa trece negoshinan cu lo contribui na mehoracion di un economia sano. Un punto cu a resalta for di agenda ta e necesidad pa crea un economia diversifica. A pone enfasis riba e importancia pa crea fluho via diversificacion pa asina por crea mas trabao na San Nicolas cu lo eleva produccion local.
Un otro punto cu ta di sumo importancia ta e integracion di un servicio di ferry cu lo yega na haf na San Nicolas. Un ferry lo stimula import y export den e area aki y hunto cu esaki lo crea mas incentivonan comercial via San Nicolas pa Aruba.
Tumando na cuenta e situacion di Citgo y tambe nan recien anuncio di ‘slow down’ e operacionnan na e sitio, e ta bira ainda mas importante pa considera otro posibilidadnan pa crea pilarnan economico nobo. E ta hopi crucial cu incentivonan atractivo wordo crea pa di e forma aki haci posibel e creacion di un plan comercial amplio pa San Nicolas.
KvK hunto cu SNBA KvK lo sigui den contacto y lo traha hunto pa di nan banda yuda stimula comercio pa San Nicolas y Aruba completo.
Aruba, 5 di maart 2018
Camara di Comercio y Industria (KvK)