08-2021 – KvK a reuni cu Standard & Poor’s encuanto desaroyo financiero y economico

Oranjestad – Recientemente, Camara di Comercio y Industria Aruba (KvK) a tene un reunion cu e compania di rating Standard and Poor’s (S&P) pa delibera riba desaroyo financiero y economico. E biaha aki, debi na e pandemia, S&P no tabata fisicamenta presente, pero nan a reuni cu tur instancia importante via reunionnan digital, pa nan por haci un evaluacion debido di Aruba.

Na april 2020, na cuminsamento di e crisis causa pa e pandemia di COVID19, S&P a revisa e rating di Aruba su sistema economico y financiero di stabiel pa negativo. E bon noticia tabata cu Aruba a keda mantene su investment rating di BBB+. S&P a pronostica cu den e pandemia aki Aruba lo ta na e prome luga di paisnan cu ta depende di turismo y cu lo keda afecta pa e crisis di COVID19. Esey tabata e motibo principal cu e biaha aki e evaluacion financiero y economico di Aruba a concentra riba e impacto di COVID19 pa Aruba. CBA a calcula cu Aruba su economia (GDP real) a cay cu 26.4% den 2020 debi na e crisis economico causa pa e pandemia. Pa aña 2021 ta premira cu economia lo crece cu 5.2% si nos turismo recupera.

KvK a combersa cu S&P tocante puntonan cardinal pa fortalece nos economia y pa por garantisa e stabilidad y siguridad economico y social di henter e comunidad di Aruba. Temanan cu a wordo discuti tabata entro otro puntonan cu ta figura den e “Landspakket” Aruba. S&P ta considera e acuerdo cu Hulanda como un guia sumamente importante pa nos Pais, pa cu e decisionnan cu wordo tuma mester conduci na reformanan fiscal, economico, financiero, social y institucional.

KvK a enfatisa tambe cu flexibilisacion di e leynan laboral ta esencial pa facilita un pronto recuperacion economico. Un dunado di trabou mester tin e flexibilidad di por tuma un empleado den servicio pa un tempo limita y renobabel. Ademas KvK ta boga pa dunado di trabou wordo permiti di laga e trahadonan traha dianan y/o orarionan reduci.

Un otro punto cu ta sumamente importante pa e evaluacion di S&P ta e hecho cu Aruba a yega na un acuerdo cu Hulanda pa haya yudansa financiero den forma di fiansa cu ta condiciona na reformanan structural, incorpora den e Landspakket. E yudansa financiero, den forma di FASE, sosten financiero pa empresa chikito y mediano, y subisidio di salario ta wordo considera esencial pa por stabilisa e situacion financiero y economico.

KvK ta agradecido pa e oportunidad cu S&P a duna pa por dialoga, y KvK ta confía cu e dialogo ta contribui na un evaluacion corecto, honesto y balansa.

Aruba, 8 di maart 2021

Camara di Comercio y Industria (KvK)

Scroll To Top

Events

    Upcoming Events

    There are no upcoming events at this time.

    Make an appointment

Sitemap | Privacy Policy | Disclaimer | By orbitalnets