07-2024 – ANOCHI INFORMATIVO ENCUANTO E MISION COMERCIAL DI ARUBA PA SURINAM OTRO LUNA
Oranjestad – Departamento di Asunto Economico, Comercio y Industria (DEZHI) riba iniciativa di Minister di Economia, Comunicacion y Desaroyo Sostenibel, sr. Geoffrey Wever den colaboracion cu Camara di Comercio y Industria Aruba (KvK), a tene un anochi informativo riba 23 di mei tocante un mision comercial pa Surinam cu lo tuma lugar otro luna. E intencion ta pa comerciantenan di Aruba bishita Surinam y crea mas laso comercial cu Surinam cu e meta principal pa cera acuerdonan comercial entre e negoshinan di Aruba y di Surinam. E mision aki ta presenta un oportunidad fantastico pa empresarionan cu ta buscando pa amplia nan horizonte y investiga mercado nobo.
Mision comercial
E mision comercial lo tuma luga dia 24 pa 28 di juni na Paramaribo, Surinam y lo consisti di B2B meetings cu empresarionan di Surinam. E mision ta combina cu un evento di 3 dia di matchmaking. Otro puntonan di e programa ta sesion nan di informacion tocante e logistica y ‘Doing business in Suriname’. Durante e matchmaking lo combina diferente negoshi di Aruba cu negoshi di Surinam a base di nan potencial y similaridad. Nos comerciantenan por haya mas informacion di e producto y servicionan cu e negoshinan na Surinam ta brinda y asina trece diversificacion den nan porducto of servicio. Alabes, esaki lo por brinda comerciante local e oportunidad di exporta su producto of servicio pa Surinam.
Anochi informativo
Durante e anochi aki a brinda informacion di e obhetivo y programa di e mision, y detayes di costo y registracion. E anochi a clausura cu un sesion di pregunta y contesta. E mision aki ta un bon oportunidad pa crea laso comercial cu Surinam y oportunidad pa diversifica producto y/of servicio.
E interes tabata grandi durante e anochi informativo y tur comerciante cu kier forma parti di e mision comercial aki ta keda invita pa registra no mas tarda cu 30 di mei prximo. Por registra pa e mision comercial via e link aki: https://forms.gle/iixLaMD3dPx6tKx26 y forma parti di un tremendo oportunidad comercial. Pa mas informacion por tuma contacto cu departamento di Business Information & Support via email: businessinfo@arubachamber.com of via tel: 5821566 etx. 330/335/342.
Aruba, 29 mei 2024
Camara di Comercio y Industria (KvK)
Scroll To Top
Events
Make an appointment
